شخابـيـط نـعـكـشـه فـشـنـك

بدون معلم: كيف تحصلين على الجسم المثالي :D

2009-07-25T20:51:00.010+03:00

السلام عليكم ورحمة الله وبركاته

سيدتي هل تحلمين بالحصول على الجسم المثالي ؟

هل تريدي ان فقدان بعض الوزن دون اللجوء الى ممارسة الرياضة ؟

هل تريدين الحصول على "تان" على بشرتك ف اي وقت دون الذهاب الى المصيف ؟

هل تحلمين بدخول كلية الشرطة لمجرد تجربة القفز من اعلى المسامير والمناورات بينها وتفادي المواد المتساقطه من الاعلى على راسك او احتمال سقوط اجسام ضخمه عليكي في حال حدوث اي خطأ اوالصعود الى اماكن شديدة الارتفاع ف اساسانسير متعلق من طرفه على عمود واحد ؟!!

هل تريدين رفع لياقة جسدك بعيدا عن المواظبه على السويدي ؟

هل تكرهين الجلوس ف السونا و تريدين ما يحقق لكي نفس النتيجه ؟

هل نصحك بعض الاطباء بعمل ماسك من الاتربه كما ف الصين ولم تستيغي التجربه مع الرغبه ف تنفيذها ؟

هل تودين غسيل جميع ملابسك يوميا من الاتربه والاسمنت للتاكد من جودة صناعة الماركات العالميه ؟

هل تريدين اختبار قوة تحملك لضربات الشمس قبل الطلوع ف سفاري مع بعض الاصدقاء ؟

الان.. يمكنك تحقيق كل ذلك ف خطوة واحدة...

التدريب الصيفي لمهندسي مدني !!!!!

طبعا ده عباره عن "بعض من كل" :s:)

دي اول سنه انزل تدريب صيفي وصراحه حاجه جميله جدا

احنا عندنا ف مدني فيه مهندسين تصميم و فيه مهندسين تنفيذ.. التصميم دول مهندسين قاعدين ف مكاتب على كومبيوترات ( زمان كان على لوح الرسم ) وده اسمه مكتب استشاري

والتنفيذ دول اللي بينزلو مواقع.. بيكون فيه عمال بيشتغلو.. وعلى العمال بيبقى فيه مشرف عمال.. وعلى المشرف بيبقى فيه مهندس مقاول.. وبيبقى متابع العمال نفسهم طبعا برضه.. وعلى المهندس المقاول ده بيبقى فيه الاستشاري..
وده اللي انا نازل ادرب معاه.. اللي هو استشاري ( شغله مراقبه التنفيذ وكده )

هو المفروض مفيش الكلام اللي انا كاتبه فوق ده (بتاع الحصول على جسم مثالي :D ) يعني الاستشارين بيقعدو ف اوض مكيفه.. وبينزلو الموقع كذا مره بس لما يكون فيه request لاستلام حاجه من المقاول

لكن عشان انا لسه بتعلم وكده فمبحبش اقعد ف الاوضه.. ف 24 ساعه واقف ف الموقع حتى لو الاستشاري اللي بدرب معاه رجع الاوضه

باي حال من الاحوال التدريب مهم جداااااااااااااااااا ومفيد الى ابعد جدود.. حتى مجرد الجلوس ف الاوضه ومتعملش حاجه حتستفيد جدا.. لان 24 ساعه فيه مواقف بتحصل كتير جدا وبتتعلم منها..

مثلا: كان فيه ف احد اللوح مسافه ناقصه ومش لاقينها انا و الاستشاري.. هو بص فيها 10 ثواني بس.. وبعدين رفع التلفون واتصل ف المكتب عشان يسال المصمم على البعد ده يطلعه من الكومبيوتر علطول
انا لو مكنتش شوفت الموقف ده وكنت بشتغل ومش لاقي مسافه على اللوحه اكييييييد كنت حقف على حواجبي عشان اطلع البعد ده.. لاني كنت حبقى مفكر انها اهانه اني مهندس ومش عارف اطلع بعد مش موجود !! حتى احسبه to scale من اللوحه
لكن الاستشاري ( عنده 49 سنه و خبره 26 سنه !! ) ف ثانيه مترددش انه يسال عليها علطول...

ده مثال صغير بس لان بدون ما تعمل حاجه ولمجرد القعاد والله حتلاقي نفسك بتستفيد وبتتعلم حاجات كتير مش حتتعلمها ف الكليه ابدا

انصح بشده بشده اشده بضرورة التدريب اي كان مجالك لانك حتتعلم شغلك الحقيقي.. وحتلاقي نفسك بتحب العلم اللي بتدرسه ف الكليه اكتر لانك بتشوف فايدته وتطبيقه قدامك و حتحس نفسك بتنجز وبتعمل حاجات باللي اتعلمته ومستفيد منها فعلا.. فلما ترجع الكليه حتبقى عايز تتعلم فعلا.. مش بتتعلم لمجرد تخلع وخلاص

حبقى اكتب تاني ان شاء الله عن التدريب اللي واكل معظم الوقت

فضائح طقووس الامتحانات.. الجزء التاني

2009-05-15T12:12:00.004+03:00

السلام عليكم ورحمة الله وبركاته

الجزء التاني ده بقه حكلكم عن طقوس ايام الامتحانات بتاعة صحابي وزوار المدونة الاعزاء زي ما اتفقنا ف الجزء الاول :)

مكان المذاكرة برا البيت

دي احد الحاجات الاساسيه المرتبطه بوقت المذاكره عند الناس.. اللي هو من اهم الطقووس المذاكرة في مكان معين.. ومعظم الناس بتذاكر ف اماكن اوضاع غريبه جدا..

يقول legend: انا ليا واح د صاحبى بيغطى عربيته وبيدخل جواها وينور شمعة ادام وشمعة ورا ويملا العربية ورق وملازم وكتب
ويبدا يذاكر وممكن ميطلعش من العربية غير تانى يوم
ويقول لاسع افندى:
اغرب حاجه عملتها انى رحت اذاكر فى محطة السكه الحديد اه والله محطة اسيوط رصيف واحد والحمد لله نجحت
بس نصيحه اللى رايح يذاكر فى المحطه يذاكر جنب قطر درجه اولى علشان يجيب تقدير حلو

مكان المذاكره جوا البيت

والجميع اجمع انه لا يمكنه المذاكره على المكتب :)

ليا واحد صاحبي مبيعرفش يذاكر الا في البانيو !!

تقول semsema: مع دخول الامتحانات الموبايل مش بيفارقني ثانية واحدة.. وباخد عدتي واتجه الى اوضتي تحديدا ع السرير (الدور التاني) العدة مكونة من الآلة الحاسبة والمقلمة وكتاب المادة وطبعا بيلحق بيهم بعد كدا كوب النسكافيه.. المكتب بيكون مهجووور ايام الامتحانات..
ويبدو ان موضوع المذاكره على السرير ده منتشر عشان eng: nagwa قالت: من اهم طقوس مزاكرتى انى مش بزاكر غير علي السرير ولما بزهق بقوم اتمشي في الاوضه وبحفظ بصوت عالي
وعندى بنت جارتى عندها سنتين ونص ما شاء الله بغبغان بيردد ورايا :D
انا فاكر ايام اخر شهر بتاع 3 اعدادي تقريبا كنت بحب اطلع حاجه زي كومدينو صغير كده في البلكونه و احط كرسي واقعد اذاكر في الهواء الطلق اثناء شرب الشاي
قالت زهرة الجبل: لما بكون بذاكر من مادة ليها ورق (ودى نادرة),, بفرش الورق حواليا على الأرض وأندمج بقي
وتقول موناليزا: ليا واحدة صاحبتى كانت بتذاكر فى الحمام اول ماالامتحانات تبدأ المغص يشتغل فتاخد الكتاب وعلى الحمام
وتتحدث عن نفسها فتقول: انا كنت بذاكر يإما فوق ترابيزة السفرة يا إما تحتها لكن ماعدتش طبيعية كده على الكرسى
وتتفق معاها Soul.o0o.Whisper حيث قالت: أنا مش بيحلى لى المذاكرة الا لو طلعت استربعت على المكتب من فوق :)
و ايام ثانوية عامة حطيت اللحاف فوق الدولاب و المخدة و عملت قعدة ظريفة و بئيت أذاكر فوق الدولاب
و لا ماما .. فرجت عليا العيلة كلها

الاكل

وده برضه بيتغير ايام الامتحانات بشكل غريب..

ليا واحد صاحبي قالي في ليلة امتحان فانيال دماغه تربست وطلبت معاه ياكل حاجه مش فاكرها كده بس مش منتشره يعني.. ونزل الساعه 1ونص بالليل ولف مصر كلها على محل يكون فاتح وبيبيع.. وملقاش غير في مكان بعيد جدااااااااا وبعد وقت طويل !!
تقول موناليزا: ليا واحدة صاحبتى بتحب تذاكر فى المطبخ عشان تبقى جنب الاكل بدل ماتفضل راحة جاية على المطبخ استقرت فيه
وشاركت معنا دكتور أروى @ :هى الحاجة الغريبة اللى بتحصل لى انى ببقى عايزة آكل اصناف معينة ، واعمل ف البيت حكابة عشان الحاجة ديه
قال يعنى خلاص هى اللى لما آكلها هذاكر احسن
اما مشاركة Bent Men ElZaman Da !!: فى ثانوى كنت بأكل كتير اوى
لدرجه انى مره كلت نص بطيخه لوحدى لحد ما بقيت شبهها ههههههههههههههه

اخرى

طبعا من اهم الحاجات والطقوس المتلازمه مع الامتحانات ان الواحد بيكتشف ان كل حاجه مهمه في الحياة الا المذاكره.. فبيكون عنده قدره رهيبه على تاجيل المذاكرة

وتتفق معايا زهرة الامل فتقول: يبقى من أول اليوم وإنى كل شويه أقول قايمه أهو بس هاخلص كذا الأول
وكذا دا مبيخلصش ..
عموماً أيام الإمتحانات بنفتكر اللى عمرنا مابنفتكره فى العادى ونقعد نطلع بحجج وحجات غريبه كدا

واحد تاني ودي استغربتها جدا.. قالي انه بيقلع هدومه وهو بيذاكر :D
واللي اندهشتله اكتر اني اكتشفت انها ظاهره مش واحد بس.. فيه 2 تقريبا قالو كده.. واحد منهم بالملابس الاحم احم خاصه.. والتاني من غير :d
ضحكوني اوي بجد
واحد صاحبي بيفك كارت الشاشه يوديه عند عمه اللي ساكن في اخر الكره الارضيه بالنسباله عشان يبعد عن الكومبيوتر + يغلي اشتراك النت الفتره دي.. وواحد تالت بيفك كابل الباور ويطلع يرميه من الشباك !
قالت زهرة الجبل: بربط الحاجات اللى بذاكرها بقصص ومفاهيم عاديه الناس بتستخدمها أو أنا بخترع لها كلمه كده يعنيواخواتى واصحابي بيتريقوا عليا
وتقول Semsema: يعني مع دخول الامتحانات الموبايل مش بيفارقني ثانية واحدة المسجات (دا ان مكانتش مكالمات) مش بتبطل لازم نطمن ان كلنا لسة مخلصناش كل خمس دقايق وحدة تتصل او اانا اتصل بيها
انواع الاحباطات بئا .. احنا مش هنلحق نخلص .. انا هروح الامتحان مش مخلصة .. حاسة ان الامتحان جاي صعب .. مش فاكرة حاجة من اللي ذاكرتو
وضحكني اوي Manas: من النوادر انى كنت بذاكر انا واصحابى على النت
نفتح الايميل ونعمل كونفرنس ونشغل المايك ونعيش

بس كده :)

واشكر كل اللي ساهمو بمشاركتهم وقصصهم الرهيبه دي :)

ولو حد تاني حابب يشارك باي طقوس يبقى يكتبها ف التعليقات وحبقى احدث الموضوع هنا ان شاء الله :)

الامتحانات.. فضائج الطقوس وطقوس الفضائح

2009-05-12T02:45:00.003+03:00

السلام عليكم ورحمة الله وبركاته

جدول الامتحانات نزل وفاضل اسبوعين !! يانهار اببببببببييض.. بسرعه قوم اعمل احصاء للمنهج وشوف كل ماده كام ملزمه ومتوسط عدد ورق الملزمه الواحده وبتخلص ف اد ايه وبعدين اعمل جدول بسررررررررررررررررررررعه

لما اشغل الكومبيوتر شيويه اتسلى وانا بعمل الجدول.. احط اي حاجه شغاله اسمعها..

ايه ده ايه الايميل ده.. لما اقراه في السريع..
يانهار ابيييييييييييييض ايه الايميل الفظيع ده !! ( وهو مجرد ايميل فورود اصلا ) لا لا لازم ارد على اللي بعته واشجعه واقوله انه ايميل رائع.. مانا لازم يبقى لي دور ايجابي طبعا !! مهو ممكن يحبط لو محدش عبره كالمعتاد..

طب لما ابص على الاخبار في مصراوي في السريع عشان اقوم بعدها..
يلهووووووووووووووووي شوفتو !! مقتل طالب امريكي على يد زميله في الجامعه في ولاية معرفش ايه !! لا ده انا لازم افتح المنتدى بسرعه واحكيلهم عن القضية الخطيره دي وتاثيرها على المجتمع المصري ودورنا المفروض نعمل ايه ونلحق نتصرف ولا اي بطيخ..

فين وفيييين.. لما اعمل الجدول بقه.. 10 دقايق الجدول خلص.. بعد حوالي 3 4 ساعات ضاعو في ولا شئ واحنا طول السنه منحرفين انحراف عالمي اصلا وابيض ياورد
ياااااه الساعه بقت 7
لا انا بقه حذاكر من بكره عشان ابدء اليوم من اوله بنشاط واحس واخد على اني بنجز من الاول كده.. مش يكون النتيجه النهائيه في المحصله ساعه في اليوم فاخبط.. فبكره ان شاء الله اصحى بدري وانجز..

طب طالما حبدء مذاكره بكره.. فانا اعمل كل اللي نفسي فيه على النت بقه عشان اشبع منه.. والمفروض بنام 1 2 مثلا فافضل سهران لتاني يوم الصبح !!

اصحى تاني يوم الضهر العصر.. لا لا لازم اتغدى الاول عشان ابقى مركز وانا بذاكر لما اذاكر.. لما استنى الاكل بقه والقي نظره على النت..
اوباااااااااااااااااااااا ده فيه واحد قالي جزاكم الله خيرا في الموضوع بتاع المنتدى بتاع البارح ! ده انا لازم اناقشه في راييه الرهيب ده ونتجاذب اطراف الحديث ونشوف نقط الخلاف والاتفاق ونتناقش يعني !!

وبعدين الغدا.. وبعد الغدا طبعا لازم الحلو.. ولازم الفاكهه.. وبعدين عصير فريش.. وبعدين ممممم لما اخد دش عشان انتعش.. وبعدين يانهار ابيييييييييض بقه محمد اللي بيرنلي كل يوم ده 10 مرات رنلي !! ده اكيد فيه موضوع مهم وكان عايز يتكلم معايا فيه !!!!

الووووو ها يامحمد احكيلي قصة حياتك اخر 10 سنين من ساعه ما شوفتك بعدها كل يوم تقريبا !! بس بالتفصيل لو سمحت..
طب ياحاج محمد كده الرغي ده كله :@ مش عارف ان عندي امتحانات و انا ضايع وفاضل اسبوعين !! يله خش على المسنجر نكمل الموضوع ده عشان ابويا عايز التلفون

وبعدين تاني يوم خلص اهو بدون اي محصله.. طبعا معروف.. اسهل حل امسك الجدول اضغطه شيويه عشان تحذف اليوم منه.. واصلا الجدول غير بشري لاي حد !! يعني محطوط فيه حاجات لا تصدق عشان تتنجز في الاحلام بقه !!
خلصنا الجدول الجديد ؟ طب انا اشيل المكتب واحطه قدام السرير ( احد الطقوس ) عشان اصحى بكره الاقيه كده واتشجع واتلم وابقى فاكر ان عندي امتحانات وابدء مذاكره..
وبعدين لما اشبع من النت بقه عشان ابدء بكره بضمير

وهكذا الى ما لانهايه :s

هداني الله واياكم :)

انتظرو الفضايح والبلاوي في الجزء التاني ان شاء الله وحتكون عن الطقوس الغريبه جدااااااا اللي عرفتها من صحابي انهم بيعملوها وقت الامتحانات..

مثال: واحد مبيذاكرش غير في البانيو !!

فياريت لو كل واحد عنده طقوس غريبه للامتحانات سواء هو او صحابه ويحب يشارك بيها.. يبقى يكتبها في التعليقات في الموضوع ده.. وفي الجزء التاني ان شاء الله حكتبها باسمه طبعا :)

ملاحظه: بشمهندسه نجوى "ENG:NAGWA" هي اللي اقترحت عمل البوست دي :)

اشمعنه احنا ؟؟

2009-05-07T01:43:00.010+03:00

السلام عليكم ورحمة الله وبركاته

دي صورة الكورة الارضيه.. وكل ما يكون لون البلد غامق اكتر ده معناه ان فيه نسبه كبيره من المسلمين..

للتكبير اضغط هنا

البارح كنت بتفرج على حاجه كده.. وافتكرت اخوانا في سوريا.. وان عليهم عقوبات اقتصاديه ومحظورات و..و.. فقعدت افكر.. ليه الكره الارضيه ضددنا !!

اي دوله فيها مسلمين لازم تلاقيهم قارفينهم في عيشتهم.. شوفو العراق يروحو يمسكو رئيسها ويعدمو و يسرقو البترول والعلماء يموتو او يختفو و المتاحف بتتسرق والله اعلم التاريخ حيتغير ولا لأ.. معليش اصلهم اعتمدو على معلومات استخبراتيه.. ان شاء الله الرئيس الجاي حنبقى نخلي بالنا !!

فلسطين غزة حصلت فيها اباده ومفيش حد عمل حاجه. واللي قال نحن نشجب ونعترض اصبح بطل اصلا بعد زمان ما كنا بنتريق عليه لان فيه دول مفتحتش بؤها حتى !! ودي كانت ايه !! اباده اباده.. مش مجرد حتى موتو قيادي معين ولا حاجه من بعيد الجبناء وجريو !! وعادي..

وشوفو ده: الطاقة الذرية تؤكد العثور على يورانيوم عالي التخصيب في مصر

لكن يجي حد في دوله مسلمه كان عمل مصنع نووي ذري سري لتصنيع بمب رمضان.. اوباااااا يلهويييي اجرو بسرعه فين مجلس الامن نروح نشتكي فيه.. ومجلس الامن مش مستنيهم اصلا ويطلع القرار علطول انها دوله ارهابيه شريره ويروحو يضربوها بسرعه !!

لكن اسرائيل معروف ان عندها اسلحه نوويه.. عادي جدا !! مفيهاش اي حاجه ولا حد من دول الكره الارضيه كلها يقدر يفتح بوؤو ولا يعملها حاجه !!

ولو ملاحظين مفيش دوله بقه يحصل عليه حرب ولا اي مصايب من دي الا لازم تكون مسمله.. فلسطين العراق افغانستان السودان سوريا لبنان الشيشان البوسنه والهرسك تركستان في الصين ..... اي دوله مسلمه !!

ليه الدول الاسلاميه بس ؟ معقوله كل الدول مفيهاش اي مشاكل معادا عندنا ؟ اصل مستحيل يعني !!

ولا من المعقول انه من قبيل الصدفه ان كلللل الفتره دي ومفيش ولا مشكله في الدنيا الا لازم تكون في دوله مسمله !! حاجه لا تعقل يعني..

مين ده اللي له الحق انه يروع اخوانا في كل مكان ؟ مين اللي في ايده يحكم ان المسلمين يفضلو عايشين حياتهم في بلاء و قرف وعدم استقرار ويتحاربو في كل مكان ؟ ليه مبقاش من حقهم يعيشو في هدوء وسعاده زيهم زي اي بني ادمين تانين ؟ مش بشر هم ؟!! ليه مش من حقهم اي حاجه كده وكل العالم واقف ضددنا ؟

اشمعنه احنا ؟

تلاته ضرب تلاته بكام ؟

2009-04-30T13:21:00.014+03:00

السلام عليكم ورحمة الله وبركاته

كنت عايز اسال هو احنا بنتعلم ليه ؟ يعني ايه الفايده اننا نقعد ندرس حوالي اتنين وعشرين ولا اربعه وعشرين سنه من حياتنا (حولي تلت حياتناا) !!!!!!!!
يعني ليه الاهالي بجد بتفضل المده الفظيعه دي كلها يعلمو اولادهم بدءا من الحضانة و الكيه جي و ست سنين ابتدائي و تلاته اعدادي وزيهم ثانوي و اربعه خمسه سته في الجامعه !! ومصاريف و دروس و وقت ومجهود عصبي و..و.. ليه كل ده ؟

مش عشان نقدر نكمل حياتنا و نكون سعداء في حياتنا ومبسوطين ؟

يعني الهدف اللي الاهالي حاطينو قدام عنيهم هو السعاده لاولادهم مقابل كل ده..

طب ياترى هل السعاده فعلا بتتحقق بالنجاح العلمي ده ؟ او النجاح العلمي ده اصلا ممكن يحصل اعتمادا على الحاجات اللي قولتها دي بس ؟ (المدرسه والكليه والدروس و..و.. ) وتلاقيه حافظلك شيوية قوانين شديدة التعقيد وفيها خمستاشر ترم.. وكل ترم منهم بيتحسب بقانون لوحده!!

هل بكده هو ضمن لنفسه مستقبل سعيد فعلا ؟

فيه قوانين وقواعد تانيه رب العباد اللي حاططها وهو نفسه اللي خلق الكون فهو الادرى باحسن طريقه للحياه فيها.. فازاي مش بنهتم بالقوانين اللي ربنا حاططهالنا عشان نعيش بيها ونكون سعداء في الدنيا.. وكمان والاهم اننا نضمن اخرتنا لان اصلا الدنيا دي يعني هي كام سنه وخلاص.. المهم بعد كده في الاخره اللي حنعيش فيها الى ما لا نهايه

مثلا لو الاهل مكنوش زارعين جواالواحد القاعدة بتاعة ان الجزاء من جنس العمل ( اللي هو زي كما تدين تدان.. على فكره الحديث ده ضعيف).. هل فعلا حيقدر يتعامل عادي في حياته ؟

زي مثلا قصة دقه بدقه لو زدت لزاد السقا.. دي قواعد المفروض لازم نكون متعملينها

قاعدة زي ما مثلا ربنا سبحانه قال " وإن سألني لأعطينه" !! يعني مش كل اللي بيجي بيجي عشان بتتعب بس !! اكيد ده مهم برضه.. بس اصلا كده كده كله بيجي بمشيئه الله !! تخيلو القاعده دي مهمه اد ايه !! اد ايه الدعاء ده مهم جداااااااااااا وممكن يغير حياة واحد كمان !!

وَلَوْ أَنَّ أَهْلَ الْقُرَى آمَنُوا وَاتَّقَوْا لَفَتَحْنَا عَلَيْهِمْ بَرَكَاتٍ مِنَ السَّمَاءِ وَالْأَرْضِ وَلَكِنْ كَذَّبُوا فَأَخَذْنَاهُمْ بِمَا كَانُوا يَكْسِبُونَ {الأعراف: 96}

الرضا
"عجباً لأمر المؤمن، إن أمره كله خير، وليس ذاك لأحد إلا للمؤمن؛ إن أصابته سراء شكر فكان خيراً له، وإن أصابته ضراء صبر فكان خيراً له." رواه مسلم.
قال سبحانه: وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ {البقرة:216}.

وحاجات كتير جداااااااااا ممكن تغير حياتنا تماما مهما كان وضعنا !!!!!!!!

مش عارف ليه مش بنهتم الا بالقوانين بتاعتنا بس شوفو كده كل واحد مخصص لنفسه بجد وقت اد ايه مثلا عشان يتعلم قوانين ربنا دي ؟ ومخصص في المقابل اد ايه قدامهم عشان يروح الكليه مثلا ولا يلعب حتى او يقعد على النت ؟
دايما بننسى قوانين ربنا واللي هي معموله اصلا عشان تيسرلنا الحياة واحنا اللي بنعقدها ونصعبها على نفسنا... وحنندم عليها سواء في الدنيا عشان معرفناش نوصل للي عايزنو بطريقتنا.. وحنندم في الاخره عشان حنتمنى نرجع ولو ساعه عشان نحاول نغير اخرتنا !

Pain & just pain

2009-04-27T15:34:00.002+03:00

السلام عليكم ورحمة الله وبركاته

ليا واحد صاحبي عنده 20 سنه يمكن او اكتر او اقل.. مبيقدرش يكلم اي حد في موقع مدرس.. سواء كان مدرس او دكتور او بشمهندس معيد.. اي واحد.. ده يرجع لسر كبير جواه.. ان زمان وهو صغير اتظلم في موقف فلمدرس ضربه بالقلم وكذا مره.. مع ان الموقف ده مظلوم فيه.. فالغاية دلوقتي مبيقدرش يكلم اي حد مدرس ابدا او يواجهه في اي موضوع

كل واحد فينا جواه اسرار كتير.. منها الاسرار اللي يادوب اسرار عن الاغراب.. او لانها حاجات غلط.. او لانها حاجات ممكن بيتكسف منها.. او لان محدش حيفهمه.. او اخيرا لانها حاجه واجعاه جواه..

المشكلة ان لو اسرار دي كترت غالبا الواحد بيحس انه وحيد.. لان الاسرار دي جواه هو وحده.. ومحدش يعرفه هو نفسه بشكل حقيقي كامل غيره.. فبيحس بوحده حقيقيه

انا كمان عندي اسراري وفيه حاجات شبه مستحيل ان حد يوصلها.. وفيه حاجات تانيه مش بحب احكيها لان مش الاصل ان الواحد يحكي كل حاجه لكل حد طبعا
فيما عدا حد واحد سبحان الله لغاية دلوقتي مندهش منه :d

ده الوحيد في حياتي كلها اللي كنت بحكيله حاجات لا اتخيل ازاي كنت بحكيها..
الاغرب في الموضوع اني كنت بكون في قمة سعادتي وانا بقولهاله والله العظيم !! مش عارف ليه ابدا !! يعني اني احكي الحاجات دي.. دي حاجه رهيبه جداااااا في حد ذاتها.. لكن اكون مبسوط كمان :| بجد كنت بندهش

كنت بحس انه مدخل ايده جوا صدري وماسك قلبي زي الصوره دي (من غير التعبان طبعا) وفاهمني جداااااا عكس ما كنت متصور ان السر ده ممكن محدش يفهمه!!

بس عامة سبحان الله الواحد فعلا لما بيطلع بعض الحاجات اللي جواه ويـ

Share them
يحس براحه غريبه واطمئنان مع ان عمليا هو معملش حاجه يعني في المشكله باعتبار انها مشكله!

المهم كل اللي عايز اقوله.. ان مش كل الاسرار اسرار.. ومش كل الاسرار لازم محدش يعرفها غيركم.. كل ما تكونو شايلين الحمل لوحدكم كل ما حتتعبو اكتر.. وكل ما تعتفد ان السر ده المفروض ميطلعش (ابدا) لاي حد.. كل ما حتكتشفو اد ايه كنتو غلطانين زمان! وكل ما مش حتستفادو اي حاجه باحتفاظكم بسركم ده لنفسكم !! بالعكس حيفضل "ينحر" جواكم ويتعبكم اكتر.. ومن الناحيه التانيه بجد الصداقه او الحب و التواصل والمعرفه والثقه و..و.. كل ده مش بيتبني من او على فراغ.

لو مش مصدقني جرب تحكي لاي حد بتحبه وتثق فيه بجد سر عندك مضايقك مثلا.. جرب في اي سر معفن حتى :) لو ملقتش نفسك بجد استريحت (من منطلق ان السر ده تاعبك) او ان فعلا علاقتك مع صاحبك ده بقت اقوى.. او انك لقيت ان السر ده مكنش يستحق يكون سر اصلا وفيه حاجات كتير احنا تاعبين نفسنا وعاملين عليها سور على الفاضي.

التدوينه دي كنت ناوي اكتب فيها حوالي 4 5 سطور بس اللي هم الاولانين.. وحاسس الكلام والافكار ملخبطه جدا معرفش فيه ايه وفي نفس الوقت حاسس انه قليل جدا وعايز اقول اكتر..

ماعلينا

اهلا وسهلا

بوسطه بوسطه

2009-04-23T14:29:00.009+02:00

السلام عليكم ورحمة الله وبركاته

من حوالي 3-4 سنوات كده كان فيه مشكله ومش عارفين نوصل لواحد صاحبنا.. وموبايله كان مدمر.. وكان عيان جدا بعد عمليه عملها فكان بينام فترات مرعبه وغير منتظمه فمكناش عارفين نكلمه.. وفي نفس الوقت الكلام اللي عايزين نقولهولو مينفعش نقولو لحد يوصلهولو (والله ما فاكر كان ايه بس كانت حاجه مهمه اوي ليه هو!!) المهم ففي الاخر عديت عليه واديته جده جواب يدهولو وكانو مستغربين اوي :D

ومن حوالي اسبوعين كده برضه اختي كانت بتقولو لماما اشمعنه طارق بيجيلو جوابات كده دايما (مع ان كلها فواتير وبلاوي زرقا!! ) انا حبعت لنفسي جوابات انا كمان :D

وسبحان الله والله بفرح بالجوابات دي :):) معرفش ليه مع اني عارف ان كلها حيبقى فواتير واشياء من هذا القبيل الا انها لمجرد انها جواب فحلوه والله :)

وفعلا الجوابات ليها وقع على الواحد غير لو كان نفس الجواب مكتوب في ايميل او حاجه.. معرفش ليه

اصل الجواب تحسه بشكل من الاشكال متعوب فيه.. ومعمولك انت بس وباهتمام.. (مع انه دون مجهود يذكر) وكمان تحس فيه روح الواحد..
وروح الواحد بتظهر في الجواب عشان بيكتب بخطه مش مجرد بخط اله ديفولت غالبا كمان.. وبقلمه و لونه القلم ده.. وممكن كمان يعطر الرساله.. ممكن يرسم فيها اشكال او رسمه او اي حاجه وانك كمان تبقى لامس الورقه بايدك وانت بتقراها.. في النهايه بتحس بجد الرساله دي فيها جزء من روح اللي قدامك مش مجرد كلمات وصلتلك في ايميل.. وان كانت بتكون حلوه برضه بس مش زي الجواب ابدا

ده جواب جالي من ابن خالتي من يمكن اكتر من عشر سنين وكنا في السعودية

وانتو اكيد برضه اكيد اثر ان يجليكم مثلا كارت صغير مع اي هديه مكتوب فيها شيويه كلمات متهايلي بيكون اجمل الف مره من اس ام اس او ايميل مهما كان فيه كروت فلاش جامده جدا..

كمان مش عارف ليه بطلنا نبعت ال post card

مع ان فكرته جميله جدا وبسيطه.. خاصه لو بتبعت لحد من بره مصر او من بره دولتك اللي انت فيها يعني.. او على الاقل المدينه ويكون الكارت ده عليه رسمه لمدينته ولا حاجه..

اخر حاجه فيه فكره حلوه اوي كانت ايس قالت ان جارهم عملها.. ان في العيد جاب كروت تقريبا حسب ذاكرتي وكتب فيها وحطاها عند ابواب جيرانه كلها.. فلما صحيو يوم العيد الصبح وفتحو الباب ولقوها كانت حركه جميله جدا منه..

بجد نفسي ابعت جوابات وكده :D
ويجي على غفله برضه الراجل بتاع البوسته (فاكرين الكلمه دي ؟ :) ) ويقول وصلكم جواب.. واقعد ابقه عايز اعرف مين اللي وصله جواب بالظبط وياترى فواتير وكده ولا جواب جواب :)

بجد لازم اتصرف لانها حاجه حلوه والله :)

فكرت اعمل زي بتوع زمان حتى اللي هو ال penfriends ..

عامة لما الاقي تطبيق مناسب وعملي حبقى اقولكم ان شاء الله يمكن تحبو تجربو :)

لو حد عنده تجربه مع الجوابات دي حاليا او بيبعت جوابات لاي حد ياريت يقولنا هل فعلا الموضوع حلو ؟ ولا ممل مثلا؟ ولا فيه اهمال وفيه احتماليه كبيره ان الجواب يضيع او يتاخر اوي..

نصائح وفضائح ? presentation أزاي تعمل

2009-04-16T17:58:00.009+02:00

السلام عليكم ورحمة الله وبركاته

الصيف اللي فات كنت في كورس في ال amideast
وكانو طلبو مننا نعمل presentationفي اخر الكورس عن اي موضوع نحبه..

ملاحظه.. عشان الكلام بيتلخبط لما اكتب كلمة انجليزي وسط الكلام العربي.. فلما اقول كلمة "البطيخه" تعرفو اني اقصد مكانها كلمة
presentation

معظمنا ممرش بتجربة انه يعمل البطيخه قبل كده.. فاول مره دايما بيحصل اخطاء كتيره.. وبنتعلم كتير برضه.. ففي التدوينه دي ححاول اقولكم كل الحاجات اللي اتعملناها في الكورس عن ال البطيخه وكمان اللي اتعملناها من كورس تكنكال رايتنج عندنا في الكليه
..

وفي الاخر حقولكم الـفـضـــيــحـــة اللي عملتها في مشروعي :D

New Page 1

في الاول حاجه مهمه جدا

لما تتكلم مع اي واحد التواصل بينكم بيبقى مبني على 3 حاجات..

اللي هو شايفه بعينه.. زي ال

body language

الصور - الجرافات -... وده بنسبه 55% !!

تانيه حاجه هي صوتك.. بيعتمد عليها بنسبه 38% درجة وضوحه و انه عالي او واطي.. وهكذا..

تالت نقطه هي الكلمات اللي بتستخدمها.. 7% بس !!

ده بيوضح اد اييييييييه حاجه مهمه جداااااا انك تهتم اوي بالحركاتك اثناء الكلام و درجات صوتك.. لان معظمنا كل تركيزه بيكون على الكلمات والمعلومات نفسها بس..

بالنسبه للحاجات اللي اتعلمناها في المشروع عشان تعمل البطيخه

- اول حاجه واهم حاجه لازم تحدد انت بتعمل
البطيخه ده لمين ؟ يعني مينفعش نكون مثلا معظمنا خريجين من كلية تجاره وانت عمال تتكلم في ازاي الالكترون بتاع معرفش ايه بيعمل معرفش ايه !!
ده موضوع محتاج خلفيه كبيره ومتخصص اوي ولازم اللي بيسمعولك يكونو متخصصين زيك
وبالتالي اكيد وش حيفصلو منك.. وعامة اصلا لو ال
البطيخه بتاعك مش في الذيذ
بينفضو لوحدهم.. مابالك لو موضوع مش عارفينو اصلا..

مثلا كان فيه واحده معانا استاذ مساعد في كلية زراعة وقعدت تتكلم عن حشره معينه
بتفاصيل رهيبه جدا ومصطلحات غريبه جدا عننا.. فقعدنا نسمع اول دقيقه بس تقريبا ولا حاجه!!

فطالما عندك الحرية في انك تتكلم في اي موضوع.. حاول تختار موضوع ميكونش محتاج
معلومات اوليه.. او انك لازم تشرحها في الاول..

- خطأ شائع جدا.. هو انك تبص لل
board
طول الوقت وانت بتتكلم..
يعني انت بتشرح للناس.. المفروض تبصلهم.. وكمان توزع نظرك على الناس.. يعني مش تفضل باصص لواحد بس طول ال البطيخه بتعتك.. حاول توزع نظرك على اد ما تقدر.. عشان كمان تحس بالناس اذا كانو معاك ولا فصلو و لا مش فاهمين و لا زهقو و لا ايه وتعرف تتصرف.
محدش يعني حيقعد يسمع لواحد مش شايف منه غير قفاه !!

- مش لازم خالص انك تفضل طول ال البطيخه عمال تتكلم بشكل علمي بس في الموضوع
بتاعك.. حتبقى بايخه الى حد ما يعني ومفيش حاجه تخلي اللي قدامك يسمعلك اوي الا اذا
كان موضوعك شيق جدا و يهمه.. فيفضل انك في وسط ال البطيخه تحكي قصه مثلا ليها علاقه بالموضوع اللي قولته.. او
حتى انك تحكي نكته ليها علاقه نوعا ما بالموضوع مهما كانت
بسيطه..

كمان ينصح ( بضم الباء وفتح الصاد ) انك تسال اسئلة خلاللبطيخهعشان يحصل تفاعل وتواصل بينك وبين اللي بتعملهم البطيخه.. مثلا لو بتبدء في نقطه جديده.. ممكن تسأل حد يعرف حاجه عن كذا (اللي هي النقطه دي ) وواحد تاني يكمل على كلامه او يختلف معاه.. وكده الناس حنتبه اكتر..

- فيه حركة برضه عملتها في اول ال البطيخه اني قولت انه في اخره حسأل سؤال على حاجه قولتها في ال ال البطيخه واول واحد حيجاوبها صح حياخد هدية.. ( ممكن تقدم اي حاجه .. مثلا انا عملت الهديه شيكولاته سنكرز ) ده برضه بيشد انتباه الناس اكتر

- حاجه مهمه جدا بجد.. انك بعد ما تحضر ال البطيخه بتعتك سواء مكتوبة او على لباور بوينت او اي حاجه.. لازم تتدرب عليها.. بجد دي حاجه مهمه جدا جدا جدا.. لان ساعتها حتكتشف اخطاء مكنتش شايفها.. كمان حيساعدك في ترتيب افكارك اكتر ويديك ثقه اكبر في نفسك.. وحاجه مهمه جدا جدا جدا وهي الوقت..
حتشوف لما تعمل البطيخه هي محتاجه وقت اكبر من المتاح ليه ولا اقل وبالتالي حتحاول تختصر فيها او تذود حاجات تانيه..

طبعا لو ينفع تجيب ناس يسموعك وانت بتدرب حيبقى افضل.. ساعتها ممكن تسمع اسئلة ممكن
كنت حتتسالها في ال البطيخه الحقيقي بتاعك.. وتاخد بالك من الكلمات اللي ممكن
ميفهومهاش مثلا.. وبالتالي حتكون محضر شرح للكلمات دي او تكون بدلتها بكلمات اسهل..

- لو انت عامل ال البطيخه على ال
Power Point
خطأ شائع برضه.. انك تكتب كلللل اللي انت عايز تقوله في ال
slides..
وبالتالي وانت بتعمل ال البطيخه حتلاقي نفسك مجرد بتشاور على الكلام بتقراه من على الشاشه بس !! صباح الملل يعني.. فانت المفروض تخلي العنواين والنقاط الرئيسية بس مع الصور اللي في السلايدز.. وباقي الكلام حتقوله بنفسك..

ممكن تكتب جزء من الكلام اللي انت حتقوله في ورقه تمسكها في ايدك او تحطها قدامك
بحيث لو توهت في اي حته ترجع للورقه دي.. وطبعا ترتبها نفس ترتيب ملف ال
Power
Point

وممكن تعلم بالخط التقيل على كلمة في كل كام جمله توضحلك الحته دي عن ايه..
وبالتالي لو توهت وانت بتشرح ورجعت للورقه.. يادوب حتبص على الكلمات اللي معموله
بخط تقيل فتلاقي النقطه اللي بتدور عليها بسهوله..

- الصورة خير من الف كلمة

- قالتلنا برضه من الحاجات الكويسة جدا جدا انك تحط مصادر
للمعلومات في الاخر لو حد حابب يعرف ذياده عن الموضوع بتاعك.. ممكن تحط اسم
كتاب ولا 2.. وكام موقع على النت مثلا..

- غلطه كنت حقع فيها.. اني استعملت فونت مش بيبقى موجود على كل الاجهزة.. فبالصدفة
بجرب الفايل عند جهاز اختي لقيته كلــــــــــــــــه رموز !!
تخيلو تخشو القاعه عشان تعملو البطيخه وتيجو تفتحو الفايل اللي حتعملو كل البطيخه منه.. كل اللي تلاقوه في الاخر

فيفضل انك تستعمل فونتات
( Fonts )
عادية.. الا لو ناوي تعمل ال ال البطيخه من على الاب توب بتاعك ( في حاله انك بتعرف ازاي توصل البروجكتور بالاب بتاعك )

- حاجه مهمه جدا جدا جدا جدا جدا جدا بجد.. انك تستعمل ادوات
وحاجات حقيقيه عن الموضوع بتاعك.. يعني لو بتعمل البطيخه عن مكونات
الكومبيوتر.. هات معاك كارت شاشة و هارد مثلا.. بتبقى حاجه كويسه جدا وانت بتتكلم تستعمل الحاجات دي.. بتكون افضل من الصور الف مره والناس بتبصلها اكتر وبتشد النظر والتركيز جدا..

بالنسبه للفضيحه بقه اللي عملتها.. هو كانو طلبو مننا كل واحد يعمل مشروعه عن اي حاجه يحبها.. فانا اخترت اعمله عن شرم الشيخ.. فقبل البتاع بيومين.. لقيت فيه واحده مختاره تعمله عن الاسكندريه وحد تاني عن مدينه تالته.. وبالتالي حيبقى فيه 3 بيتكلمو هم كلهم عن مدن !! فحيبقى اكيد في تشابهات كتير جدا منهم وفحيعمل نوع من التكرار والملل..

فقولت ايه.. لازم افتكس

قومت قولت ايه.. البس مايوه وانا بعمل البطيخة.. كده حشد انتباهم اوي ويركزو معايا ويسيبوهم من البتاع نفسه حتى :D
وروحت قعدت استشير صاحبي قبل ما نبدء.. فل الاول مدنيش راي واضح وقعد يقول هي الفكره جديده وكلام كده يعدين.. وبعدين قال في الاخر خالص لأ

المهم نفضتله وقولت خلاص لا مفر :d

وبعدين جيه دوري.. تخيلو انتو بقه.. 10 presentations شغالين وكل واحد طالع ببدله و
مظبط نفسه اخر شياكه و عمال بيتكلم كانه دكتور في الجامعه.. وبعدين لقو واحد طالع
بمايوه ( وياريته مايوه محترم.. ده مايوه هاواي يعني اااااااااااخر فضيحه ) وكمان
كنت لابس الزعانف بتاعه السباحه ومش عارف امشي بيها وعماله تطرقع على الارض كل ما اتحرك

متخيلين الصدمة ؟

قعدو يضحكو عليا ويصوروني وحاجات غريبه كده طول مانا بتكلم..

في الاخر الحمد لله عجبتهم اوي البطيخه وكانو مركزين معايا و كنت الوحيد اللي خدت الدرجه كامله بتاعه المشروع

بس هي دي الفضيحه بتعتي.. في بلااااااااوي وتفاصيل فظيعه طبعا.. زي ازاي قلعت البنطلون اللي تحته المايوه جوا القاعه !! بس حاسس انها مش مناسبه شيويه للبنات يعني.. مع ان معظم اللي كانو في الكورس ده كانو بنات اصلا.. (اكتر حاجه مش قادر انساها ان فيه واحده شافتني لحظة وانا بنزل البنطلون واد ايه اتصدمت يعيني عشان مش فاهمه ان فيه مايوه)

المهم ياريت لو حد عنده اي ملاحظات او نصايح يحب يضفها من خبرته او مشروع كويس شافه يقولهولنا.. ولو حد حابب يحكلنا موقف حلو حصل برضه وهو بيعمل البطيخه ياريت ينورنا في التعليقات :)

"تهادوا تحابوا"

2009-04-10T19:25:00.020+02:00

السلام عليكم ورحمة الله وبركاته

النهارده عايز اقولكم على سر من اسرار الحب :)
اد ايه بجد حاجه ساحره وليها اثر رهيب على القلب.. سبحان الله بجد زي ما الرسول عليه الصلاة والسلام قال بجد.. تهادوا تحابوا..

طبعا اقصد اني بتكلم عن الهدايا :)

والهدايا انواع كتير جدا.. وليها دوافع اكتر..

والاجمل انها تكون من غير سبب :)

اصل يوم الاربعاء قابلت واحد صاحبي عشان كان مسافر السعودية.. وكان لسه جاي من اسبوع وكان مصر نتقابل مع انه راجع مصر تاني بعد اسبوع وحيقعد كتير.. فلما قابلته لقيته كان مصر عشان جايبلي هديه عشان عيد ميلادي (من شهر) بس هو كان في السعوديه.. فمكنش عايز ياخرها الاسبوع ده يعني :)
فرحت جدا بجد على اهتمامه ده
ففكرت اكتب التدوينه دي

مره واحد صاحبي شوفته فاجاه لقيته بيطلع البتاعه دي وبيقولي جبتلك هديه بسيطه.. ولغايه دلوقتي انا بعتبرها لسبب او لاخر من اجمل اجمل الهدايا اللي جتلي..
والواد ده معرفوش اوي ولا كان فيه اي مبرر او مناسبه لهديته..
فاد ايه بجد الهديه اللي من غير مناسبه او سبب بتكون غير اي هدية..

وفيه برضه الهدايا المفيده.. اللي هو الواحد بيكون كان محتاجها فعلا.. ودي حاجه مهمه اوي برضه.. والاجمل ان اللي قدامك كان حاول يعرف انت محتاج ايه من غير ماتعرف عشان يعملك مفاجاه ويجبهالك:)

......

وفيه الهدايا اللي متعوب فيها.. الهديه دي مثلا الميداليه من مكان واللعبه من مكان تاني بعد البحث عنه وبعدين تركيبهم على بعض..(+تفاصيل اخرى) فتحس ان الهديه اتعمل فيه مجهود واهتمام فبيكونلها قيمه كبيره عند اللي مهداه ليه :)

وفيه الهدايا اللي ذات معنى.. يعني الهديه دي حيكونلها معنى مختلف لو قدمتلها لحد معين.. مش حفهمكم المخده دي معناها ايه :P

هدايا الذكريات والمناسبات.. حاجه جميله اوي بجد ان في الاعياد مثلا يبقى فيه هدايا صغيره تذاكريه كده.. دي حاجه بتفضل معاك طول حياتك اصلا.. فبتفضل فاكر الناس دي اوي.. وبتبقى ذكرى حلوه اووووي مهما كانت الكلمات قليله او بسيطه..
انصح بشده بجد ان في الاعياد لو ليكم حد في البنك تجيبو جنيهات او انصاص جديده وتكتبو عليها و تهدوها للصحابكم.. اهم حاجه متنسوش تكتبو اسمكم والتاريخ عشان فيه عملات معرفش مين اللي مدهالي عشان معلهاش اسم!!.

معرفش هل فيه مخالفه شرعيه عشان يعتبر ده اهدار كانك بترمي الفلوس مثلاعشان بتستخدمها كورقه.. فممكن بدال من الفلوس تستخدم كروت صغيره

اخر حاجه ان الهدايا مش بقيمتها ابدا.. يعني عندي ساعتين تمنهم غالي نسبيا ومش عاجبيني خالص.. لكن حاجه حلوه برضه انك بتفتكر دايما ان حاجه بتستخدمها كتير كده كانت هديه من حد معين.. بس اللي اقصده انه مش لازم تكون غاليا عشان تبقى حلوه..

من اجمل الهدايا اللي جتلي في حياتي.. مره في يوم ميلادي واحد عرف صدفه من صاحبي تاني واحنا في الكليه.. ساعتها الواد ده كان مشترك في مسابقه في الجامعه وخد مركز اول في معرفش ايه وكسب ميداليه.. اصر اصرار لا نهائي اني لازم اخد الميداليه دي هديه منه عشان عيد ميلادي وهو ميعرفش فمكنش معاه هديه.. وفعلا مسبنيش الا لما ادهالي !!
انا حاسس الهديه دي من اغلى اغلى الهدايا اللي جتلي في حياتي كلها!

اينعم حاجه مهمه ان الهديه يكونلها فايده.. بس الاهم والاجمل معناها.. والتوقيت كمان مهم جداو:)

ومش لازم خالص الهدية تبقى حاجه ماديه.. مجرد حتى انك تمسك موبايلك وتتصل بحد مكلمتوش من زمان.. تحاول تساعد اي حد في مشكله عنده او حاجه محتاجها.. تكاقئ حد او تشجعه على موقف عمله ولو بكلمه بسيطه بس (ما احوجنا ليها)

وابقو قولولي ايه اجمل الهدايا اللي جتلكم في حياتكم وايه مناسبتها وليه هي جميله بالنسبالكم وتمثلكم ايه :)

“The greatest gift is a portion of thyself.” ~Ralph Waldo Emerson.
"We should give as we would receive, cheerfully, quickly, and without hesitation; for there is no grace in a benefit that sticks to the fingers." ~Seneca.
"If you give what can be taken, you are not really giving. Take what you are given, not what you want to be given. Give what cannot be taken". ~Idries Shah.

لو حد عنده اي مشاكل او اسئلة عن عمل / تظبيط البلوج

2009-04-10T13:30:00.003+02:00

السلام عليكم ورحمة الله وبركاته

لو حد عنده ياشباب اي اسئلة او طلب او كود لحاجه معينه او اي بتاع للبلوج يسأله هنا وعلى قد ما اقدر ححاول اظبطها معاه
انا مش خبير يعني خالص.. بس ححاول اساعد في الحاجات اللي اعرفها يعني او اعرف اجيبها :)

الـبـنـات.. الجزء التاني

2009-03-30T16:04:00.018+02:00

السلام عليكم ورحمة الله وبركاته

لمشاهدة الجزء الاول للموضوع اضغط هنا

ماشاء الله البنات عندهم فضول لا نهائي بجد.. المشكله بقه لو عرفو نص معلومه.. او معرفوش حاجه خالص بس شافو ظواهر غريبه على اللي ادامهم !! النتيجه المعروفه انهم لازم يتخترعو اسباب منطقيه من وجهة نظرهم عشان يريحو نفسهم(ولو نقاشتهم في الاسباب دي حتثبتلهم انها غير منطقيه اصلا) وبعد ما يخترغو القصه او الاسباب اللي خلت الشخص اللي قدامهم يعمل التصرفات الغريبه دي.. يصدقو القصه اللي اخرتعوها !! ويعتبروها واقع وخلاص حاجه معروفه ومفروغ منها ويتغاملو على اساسها كمان !! ويحكوها لصحابهم كمان :s

والله العظيم ما بالغ خالص

النقطه التانيه الاكثر غرابه بقه.. انها مستعده تسمع كلام حلو ليها وتكون فرحانه جداااااا بيه حتى لو عارفه ومتاكده انه كدب !! يعني هي بتكون فرحانه اوي ان حد يفضل يقولها اد ايه بيحبها والكلام ده.. وهي عارفه ومتاكده من جواها انه كداب تماما.. لكن مع ذلك مبسوطه بكده وبتضحك على نفسها !!

مع ان انا شايف (من وجهة نظر ذكوريه) ان الكدب في حتة المشاعر دي بالذات كااااااااااااارثه !! مش تاقص غير فقدان الثقه في دي كمان يعني!! تخيلو لو هي كدبت في حاجه زي كده.. حيصدقها ازاي اي وقت بتقوله انها بتحبه !! وحيفكر في كل حاجه قديمه قالتها وحيفرض انها غلط.. ماهو خلاص مفيش مصداقيه حتى لمشاعرها !! يعني كارثه بكل المقاييس

لكن البنات عادي وقشطه وممكن تصاحب حد مبتحبوش حتى وعارفه انه حتى مبيحبهاش وليه اغراض اخرى بيسفدها منها.. كل ده في سبيل انها تسمع كلام او اهتمام هي عارفه تماما انه كله مصالح فقط..

النقطة التالته هي الملابس....النقطه التالته اللي هو لبس البنات.. تلاقي بنت بجد بسم الله ماشاء الله.. لابسه اسدال فله.. مغطي تماما وواسع عليها.. وكمان لابسه بنطلون تحته لحسن يجي شيويه هوا يطيرو ولا تكون بتركب ولا تنزل ولا اي موقف ويبان ربع سم من رجلها!! وكمان ماشاء الله عارفه ان الاقدام عوره فمبتلبسش شباشب ولا حاجه.. يعني لبسها يدرس (بضم الياء) في نماذج اللبس..
بس هي معليش ياجماعه بتحط ميك اب.. لا لا متفهمونيش غلط.. مش حاطه احمرات وكده يعني!! يعني حاجات كده خفيفه خفيفه..
بس بتكلم ولاد الدفعه كلها.. بس امانه يعني زي اخواتها.. يعني مش ممكن تقعد مع ولد لوحدهم وهم جنب بعض اوي او لازقين مثلا.. لا طبعا!! ده كده حرام !!
بس بتحط برفيوم الناس اللي في الدور اللي فوقيهم بيشموه من عندهم.. هو معليش مركز شيويه بس شوفتو حتظلموها ازاي ؟ دي حطاه عشان وهي بتسلم على صحباتها وكده تكون ريحتها منعشه.. وهو ريحته قويه عشان نوع كويس بس.. وهي صوباعها بيجيلو تشنجات وهي بتحط الصبح فبتقعد تدوس عليه كتير بشكل لا ارادي
لا وايه.. مبتسلمش بايدها ماشاء الله !! ابدا لايمكن !! مش عارفين الحديث بتاع اللي يمس امراه اجنبيه عنه ومخيط من حديد وكده؟ بس هو حبيبها بس بيمسك ايدها وهم ماشين لحسن تتوه منو ولا حاجه...
وهكذا !!! ايه كم التناقضات الانهائيه دي ؟
اصل اللبس ده ساعتها بيكون عامل زي مايكون طقم شيييييك جدا بس واسع جداااااا على الواحد.. فهو الطقم في حد ذاته جميل اوي.. بس تخيلو واحد لابس طقم واسع جدااااا عليه والطقم شيك.. برضه شكله مش حيبقى حلو !

جزء من مسرحية عادل امام مش فاكر نص الحوار.. بس حقول الفكره عامة يعني

ام فتكات: انت حتفضل ماشي كده تستعبط وسايب البت معلقها

!!مدحت: بنت مين اللي معلقها يام فتكات

فتكات: اناا يامدشخت نسيت انت وعدتني ب ايه ولا ايه

!!مدحت: يانهار اسود!! حد كلمك ولا وعبرك بحاجه

فتكات: بتخلى عني يا مدشحت بعد كلللل ده !! تسرق قلبي وتعلقني بيك كل ده وبعدين تقولي كده

مدحت: هو انا شوفتك ولا كلمتك خاااااالص ؟؟؟

!!ام فتكات: نععععععععععععم !! مش شوفتها مره على السلم وقولتلها صباح الخير
:|::|:|:|:|:|::|:|:|:|

والله العظيم بقه مش تريقه ولامبالغه.. !! البنات لو اعجبو باي حد.. ساعتها بيتعلقو بحاجات غريبه جدااااااا تكون صغيره ومش متشافه اصلا لانها مش موجوده.. اصله قالي صباح الخير كده بطريقه غير اي حد.. اصلك مش عارفه هو بيقولي صباح الخير كل يوم.. اصله مش ممكن يشوفني وميقوليش صباح الخير
!!!!!!

وطبعا جزء كبير من الحكي ده للبنات صحابها المحيطين بيه بالذات من منطلق انها بتقولهم كده ابعدو عنه ده بتاعي انا خلاص
و اي كلمه تحصل مع الولد ده تغيرها وتلفها وتتناولها بفهوم اخر تماما وتقعد تتخيل انه بيحبها وبيموت فيها !! وانه بس كل ده (3سنوات مثلا) بيتاكد من مشاعره ناحيتها ولا بيستعد للجواز !! وهو اصلا يكون ماشي قدامها مع متين بنت ولا يبقى معروف انه عمال يدور على عروسه او اي حاجه.. وهي برضه تبقى مقتنعه انه بيحبها لمجرد اعجابها هي بيه .. فكل كلامه بتفهمه بطريقه تانيه وكل ذنبه انها معجبه بيه وهو ولا في راسه اساسا..

دقات قلب.. تدوينه لن استطيع كتابتها

2009-03-30T08:29:00.005+02:00

الـبـنـات

2009-03-27T05:10:00.012+02:00

السلام عليكم ورحمة الله وبركاته

بما ان معظم زوار المدونه حاليا من البنات.. فكنت عايز احكيلكم عن حاجات بتضحكني اوووووووووووي بجد في البنات :d

بس والله مش اقصد انتقاص من قدركم ولا حاجه مثلا.. ماحنا برضه بنعمل بلاوي.. ومنقدرش نستغنى عنكم يعني.. بس دي حاجات بحسها ظريفه اوي فيكم بجد :d

واحنا مدركين والله ان النساء من الزهرة والرجال من المريخ والكلام ده كله..

هو اللي جاب على بالي الحكايه دي.. جوء من حلقه عمرو اديب مع عزت ابو عوف.. وكان السؤال " هل الستات بتعني ما تقول " ؟؟

دي حاجه بجد من اكتر الحاجات والله العظيم اللي بندهشلها في الحياة كلها.. انهم بيقولو كلام كتير جدا وفي الاخر يقولو انهم مكنوش يقصدو ولا حاجه منه !! مع ان الكلمات والمعنى واضح جدا يعني وضوح الشمس..
على فكره نسيت اقول اغلب كلامي بين المتحابين.. مخطوبين متجوزين ايا كان وضعهم..
وتلاقي البنات معترفين بكده تماما للطرف الاخر.. ويوقلوله بشكل واضح وقت الصفاء.. يامدحت مستملعيش وانا زعلانه منك.. عشان كل كلامي بيكون غلط ومبقصدوش.. نفضلي تماما.. معرفش ايه..
طب ليه !! ازاي بتقولي حاجات انتي مش قصداها !! ومش موضوع كرامه وكده.. لا هي بتقول الكلام ساعتها بس زي ما تقول بتكون عايزه تقول معاني مثلا وبتقولها غلط او مش عارفه تعبر عنها عدل ومشاعرها متضاربه وحاجات كده :D

ومش موضوع انها بتكدب بعد كده عشان ميزعلش منها ولا حاجه.. لا والله هم معترفين بكده اصلا انهم بيقولو كلام ميقصدوهوش ومتاكد 100% من كده:d

عشان كده لو كلمت اي بنت فلما نوصل للاخر لقرار معين او اتفاق واضح يعني.. بكرره مرتين ولا حاجه واقول تمام.. يبقى ملخص كلامنا اننا اتفقنا على كذا وكذا وكذا اوقلها باكتر شكل واضح ممكن عشان ميبقاش فيه اي احتمال ان هي قالت كلام متقصدوش او الحاجات دي

حاجه كمان بتجنني.. لبس البنات في الشتا!! تلاقي الولاد يعيني متكلفتين بخمستاشر جاكت واتناشر بلوفر تحتهم وتمانيه واربعين كوفيه وطاقيتين فوق بعض وبطانيه رفيعه تحت الهدوم.. وماشين متكتين.. وبعدين تلاقي بنت لابسه جيبه خفيفه جداااااااااااااااا وقصيره ومش لابسه اي بنطلون او حاجه تحتها يعني.. كمان بلوزه مفتوحه وخفيفه برضه!! وماشين منطلقين ولا كان فيه اي حاجه!! والكلام ده طول الشتا مش يوم عابر

فيه كمان النموذج الشهير بتاع طلقني اللي قاله عموره :d
انه يحصل اي اختلاف في اي حاجه.. فتلاقي الست اتجننت وتقوله طلقني وهي مصره انه خلاص لا حوار ولا تفاهم

والراجل مش عايز يطلقها يعني!! وهو باقي عليها وعايزها وكل حاجه.. وهي مصره.وبنفس طبقة الصوت.. طلقني
في الاخر خلاص الراجل عنده كرامه برضه.. فيقوم يقولها انتي طالق
الست بقى تتصدم

بتطلقني :| بعد كل العشره والعمر ده وعشت خدامه تحت رجليك وربتلك عيالك و.. بتطلقنيي
وتقوم منطلقه

حاجه كمان مشهوره جدا بقه.. في ابداء الراي في اي حاجه يكون الراجل مش فارقه معاه في الموضوع ده ويبقى عايز يريح الست وتعمل اللي تحبه..

مدحت انا مش عارفه عايزين ناكل حاجه جديده النهارده

ياحبيبتي اعملي اللي تحبيه اي حاجه من ايديكي حلوه

بس انا عايزه اغير النهارده.. ايه رايك ناكل بره ؟

خلاص ماشي ياحبيبتي تحبي تاكلي فين ؟

ممممممم ايه رايك ناكل في تشيليز؟

خلاص ماشي ياحبيبتي تعالي نروح فرع المهندسين عشان بحبه..

مممممم بس انا حاسه انه مش تجديد اوي يعني ده احنا لسه واكلين فيه قريب وكمان بحب اكل معاك لوحدنا
الراجل جوا نفسه بقه(ايه الست المجنونه دي ! دي هي اللي اقترحت اصلا)
ماشي ياحبيبتي خلاص ناكل في البيت اي حاجه..
بس انا عايزه اخرج يامدحت.. اي رايك ناكل عند مامي؟
ماشي ياحبيبتي انا كمان عايزه اسلم على ست الكل..
بس يامدحت بقولك بحب اقعد معاك لوحدنا امال مين يدعلك وانت بتاكل وبعدين خلاص انا عايزه اكل في البيت
!!!!

طب ماشي اعمليلنا اكله جامده بقه..
تحب تاكل ايه ياحبيبي؟
اي حاجه كله حلو
طب خلاص انا حعمل ملوخيه عشان انت بتحبها
ماشي يا حبيبت قلبي ربنا يخليكي ليا
بس الملوخيه اللي عندي مش طازه اوي خلاص انا حعمل فاصوليا عشان قربت تبوظ
!!!!!!!!!!!!!!!!!!!!

الراجل حيتجنن ومعرفش ايه فايده الحديث الطويل ده كله

ماكانت تقوله من الاول انها حتعمل فاصوليا وخلاص بدال كل الكلام الغير مفهوم ده.. وهو مش فارق معاه اصلا يعني..

دي بجد حاجه رهيييييييييبه وبتكرركتير جدا وبشكل لانهائي في مليون حاجه وبندهشلها بشكل غريب وبتضحكني :d

حاجه كمان باستغربها.. اللي هي العنين.. احنا لما بنكون بنكلم حد.. بنبص في عينه عادي!! البنات لا.. بس يمكن ده من الحياء او حاجه الله اعلم.. دايما الاقي البنات عاملين يبصو في اي حاجه تانيه.. يلعبو في الايشارب يبصو على جزمتهم ويبصو على جنب يعملو اي حاجه في الحياه لكن البص في العين ده حاجه نادره جدا :d

فيما يخص موضوع العنين ده برضهفيه حاجه بتمومتنييييي من الضحك.. اللي هو البصه الخبيثه.. ان لما بنت تحس انها حتتعاكس او حد مهتم بيها وبيبص عليها مثلا.. لا يمكن تبص عليه عادي زي الناس اللي هو تلف رقبتها وعادي يعني وتشوف فيه ايه.. لا تقوم بصه البصه الخبيثه

بعنيها بس.. والمشكله انها بتفضل باصه كتيييييييربضحك اوووووووووووووووووووووووووووووووووووووووووووووووووووي بجد منها :dكأن كده احنا مش حناخد بالنا يعني.. بالعكس والله دي بتكون واضحه اكتر الف الف مره بما لا يدعو مجال للشك.. لكن لو كانت بصت عادي زي الناس العاديه.. مش باين بتبص على حد معين ولا اللي وراه ولا حركه لا اراديه كده ولا ايه بالظبط..

بس كفايه كده عشان مطولش وان كان الحديث عن البنات مالوش نهايه ماشاء الله... اقروا اول فقره في الموضوع مره تانيه :)

والولاد بيحيبو البنات زي ماهما والله:) ماحدش عايز يتجوز واحد صاحبه يعني!! فاختلافات دي بالرغم من شدة غرابتها بس حلوه بشكل او باخر:)

حاجات بستغربها في البنات الجزء التاني

تاج بهديهولكم

2009-03-25T13:08:00.019+02:00

السلام عليكم ورحمة الله وبركاته

النهارده بهديكم تاج ان شاء الله يعجبكم.. واللي ميعرفش تاج يعني ايه تاج ده عباره عن زي لستة اسئلة كده المدونين بيمرروها لبعض.. واللي تجيلو المفروض يجاوبها لو عايز (بيعمل موضوع في المدونه بتعتو ويقول التاج ده جالي ويلون الاسئله بلون مثلا والاجابات بلون تاني) ويمررها لغيره لو يحب.. ولو مش عايز يرد على التاج عادي برضه دي حاجه اوبشنال :d

التاج اهو:-

اسمك ؟
المشهور بيه وسط اصحابك؟
سنك ؟
مجال دراستك ؟
اسم مدونتك ؟
صورتك الرمزية في المدونة بتعبر عن إيه ؟؟
هل فكرت في اغلاق المدونة والسبب ؟
ايه رد فعلك لو حد قل ادبه في تعليق ؟
اسوأ مدونة ؟
هيحصل ايه للايميل بعد ما تموت ؟
اديت الباسوورد لحد قبل كده ؟
السفر بالنسبة لك ؟
الموووود بتاعك ايه ؟؟
بتعمل ايه في وقت فراغك؟
الأكلة المفضلة ؟؟
الصفات التي أخذتها من والدي ؟
الصفات التي أخذتها من والدتي ؟
اكتر ست حاجات بتكرههم ؟
اكتر ست حاجات بحبها؟
شخصيتك نوعها إيه؟
لماذا دخلت عالم التدوين من الاساس ؟
أحلي جملة قيلت في وصف مدونتك ؟
اهمية التعليقات بالنسبة لك ؟
احلى بوست كتبته ...ضع اللينك , ثم اذكر لماذا؟
أفضل مدونة قراتها ؟
أفضل بوست قراته ؟
الشغل بالنسبة لي ؟
الانترنت بالنسبة لك ؟
تمرر التاج ده لمين ؟

بهدي التاج الى:-

Ramy Mahrous
وضـّاح
Rooma Qandil
sh!ko
Momo
HelSiNg
dodiloma
زهرة الأمل
Skeleton Eel
ديساروف
مرسى الحب
MERO

وفيت دعاء وسما لما يفتحو مدوناتهم ان شاء الله :)

ملحوظه: التاج ده من مدونة الاخت لوتس777 وانصح بشدة متابعه مدونتها الرائعه

تحديث بتاريخ 27-3

ماشاء الله نص الناس اهدولي التاج تاني.. رديت على التاج خلاص في الردود..

هو انت بتعيش كام مره في ال80 سنة بتوعك؟

2009-03-24T06:09:00.017+02:00

السلام عليكم ورحمة الله وبركاته

انا عايز اقولكم على حاجه غريبه جدا بجد.. دلوقتي متوسط عمر الواحد 70 80 سنه مثلا.. ليه الواحد مش بيعيش منهم الا قليل جدا ؟ وهو اللي بيختار كده بمزاجه..

يعني اول ما يوصل سنه 50 سنه او 60 على اقصى تقدير.. ده بسميه سن الاستسلام!! تلاقي الواحد خلاص كل اللي بيعمله في حياته انه مستني الموت!! بيقعد مستني المون 15 20 سنه اللي هي ربع حياته تقريبا !! بجد بحس الناس اللي في السن ده مبيستمتعوش بحياتهم تماما خلاص ولا حتى مدين نفسهم الفرصه انهم يستمتعمو.. هو الشق الكويس في الموضوع انهم بيكونو عارفين ان الموت قرب فكتير من سلوكهم بينضبط (وفيه ناس تانيه عاااار بجد !!) بس بعيدا عن كده بجد كل حياته بتتوقف بيكون مش سعيد ابدا..

مع ان بره تلاقي الناس في السن ده مبسوووطين بحياتهم ومنطلقين و عايشين مع نفسهم وبيجربو حاجات جديده و يلعبو رياضات ويتبسطو ويسافرو وتلاقيهم جاين عندنا في مصر مثلا و تلاقيه ماشي مع مراته وماسك ايدها وعمالين يتصورو وماشاء الله مستمتعين بكل لحظه في حياتهم فعلا..

المهم اللي عايز اقوله ان الحياه مش كبيره.. واحنا اصلا طول حياتنا بنتمنى وقت غير اللي احنا فيه.. واحنا صغبرين امته نكبر ولما نخش الكليه امته نشتغل ولما نشتغل نقول ان الكليه كانت احلى ايام.. بس نقول امته نتجوز.. ولما نتجوز نقول امته ابقه اب.. ولما يكون اب يقول ايه المسؤليه والدوشه و انعدام الوقت و..و.. وامته اجوز عيالي عشان استريح.. ولما يجوز عياله يقوله ايه الفراغ والملل والوحده دي !!!

حيفضل طول حياته يدور على اوقات تانيه وخلاص ويضيع عمره كله!!

طب ليه !! ما يستمتع بكل لحظه بالوضع اللي هو فيه واكيد حيلاقي السعاده لو استمتع بحياته.. مافيه الف واحد زيه في وضع انيل منه الف مره بس بتلاقيه مبسوط برضه عشان راضي وخلاص عايش حياته.. وطبعا بيحاول يطورها ويحسنها على قد ما بقدر..

الحياة قصيره اوي بجد وممكن تتاخد مننا فبي اي لحظه... ومفيش حاجه تستحق كميات الزعل الانهائيه اللي احنا بنحسس نفسنا بيها دي.. فاستمتعو بيحاتكم :)

- Live every day as if it were your last and then some day you'll be right.
- Every man dies. Not every man really lives.
- Dream as if you'll live forever. Live as if you'll die today.
- The purpose of life is a life of purpose.
- Life is a succession of moments. To live each one is to succeed.
- As you grow older, you'll find the only things you regret are the things you didn't do.

اعمل بيهم ايه

2009-03-23T07:51:00.006+02:00

السلام عليكم ورحمة الله وبركاته

البارح وانا قاعد كده بصيت على المكتبة كده فشوفت الكتب دي وهي مركونه من فتره كبيره ونادرا ما بلاقي فرصه اني اقرا فيها.. فقولت ليه افضل مخزنهم كده يعني..

فالموضوع ده ححط فيه صور فيها الكتب اللي عندي.. ولو اي حد من العيال اللي اعرفهم عايز يستلف اي كتاب يقولي..

الكتب:-
اضغط هنا 1
اضغط هنا 2
اضغط هنا 3
اضغط هنا 4

بعد ما تحمل الصور احفظهم على جهازك واعمل زووم عشان تقرا عناوين الكتب بوضوح

جديد المكتبة بتاريخ 22-4

رواية ربع جرام

فتحت مدونه جديده

2009-03-23T06:08:00.002+02:00

السلام عليكم ورحمة الله وبركاته

ياجماعه انا فتحت مدونه جديده لنوع معين من المواضيع

ان شاء الله تعجبكم

لدخول المدونه اضغط هنا

حلاتقو موضوع تحت خالص عن هدف المدونه :)

وزير الري مسمومش وزير الري

2009-03-17T03:21:00.009+02:00

السلام عليكم ورحمة الله وبركاته

3 نقاط عن الوزير الجديد

لفت نظري حاجه غريبه جدا.. الهجوم الغريب على التعديل الوزاري الجديد واستخفاف الكثر بيه!!
اول حاجه الوازره والوزير مسموش وزير الري!! اسمه وزير الموارد المائيه والري..
ودي حاجه كبير جدااااا على فكره !! احنا عندنا في مصر متوسط نصيب الفرد من الماء المتوفر اقل من المعدل العالمي.. وفي نفس الوقت عدد السكان بيذيد بشكل مرعب مع ثبات نفس كمية الماء المتوفره.. يعني نصيب الفرد من المايه بيقل!!
وده يشمل المايه اللي بنزرع بيها.. يعني نصيب الفرد من الغذاء والشرب طبعا.. ويشمل الطاقه الكهرومائيه اللي بننتجها من حركة المايه.. يعني نصيب الفرد من الطاقة بيقل.. وقيس على ذلك حاجات كتير جدا
فالوزاره دي وزاره سيادية اصلا مش وزاره بسيطه!
الدكتور بيقولنا في المحاضره ان زمان مهندس الري ده منصبه كان اعلى من المحافظ!!
وكمان زي مانتو عارفين الفترة الجايه حتكون الحروب حروب على الماء

المهم كل اللي اقصده ان الوزاره دي مش حاجه صغيره.. فالتغيير الوزاري ده مش صغير او قليل او حاجه..

تاني نقطه بالنسبه للوزير الجديد (وهو كان استاذي في الكليه) ان بجد خدت فكره رائعه عن الكيفية اللي بيتخارو الوزير على اساساها.. وحسيت ان فعلا الوزرا دول بيختاروهم من احسن احسن الكوادر الموجوده في البلد.. وواثق جدا انهم بيتشغلو كويس جدا في حدود الموارد المتاحه في البلد.. الدكتور ده معاه مؤهلات عمليه ممتازه جدا وعمل حقلي واسع ورائع جدا.. ومن الناحية الانسانيه انسان شديد الاحترام بجد وكان اب لكل واحد فينا..

تالت نقطه هي الاعلام.. بجد حسيت اد ايه الاعلام غير دقيق تماما وهدفه الظيطه وبس !! فيه قنوات وصحف كانو بيالفو قصص غير طبيعيه عن السبب الحقيقي ان وزير الموارد المائيه السابق اتشال و الوزير الجديد جيه.. كميه معلومات لانهائيه لا تمت للواقع بصله وكل القصص ملهاش دعوه ببعض!! شيويه فرقعات اعلاميه وخلاص.. ده قالو على الوزير الجديد انه دكتور ميكانيكا!!
اضغط هنا لمشاهدة ال C.V.

اخر حاجه كنت ناوي بجد ابعت للدكتور ايميل اشكره على مجهوده وصبره الغير طبيعي علينا وتواضعه معانا واهتمامه بينا و..و.. لكن للاسف دلوقتي حيبقى صعب اوي بعد ما بقه وزير لان اكيد الكلام مصداقيته حتقل..

باي حال من الاحوال اتمناله النجاح والتوفيق وان ربنا يعينه على منصبه الجديد :)

مره كمان

2009-03-17T03:17:00.004+02:00

السلام عليكم ورحمة الله وبركاته

ازيكم ياجماعه عاملين ايه ؟ وحشتوني جدا والله

ان شاء الله حفتح المدونه مره تانيه باجنده مختلفه قليلا..

ولو فيه اي ملاحظات او اقتراحات ياريت تقولوها :)

Closed

2007-10-05T16:29:00.005+02:00

This blog was created for 1 purpose and that purpose is achieved..

lots of thx 4 every1 who supported me ( sorted alphabetically )

بالله المستعان
جوال
روعهـ
زهرة الامل
شهاب الأزهر
الشهيده
لوتس777
مبتدئ
المجاهدة
وضـّاح
وقف لله تعالى
ياسر سليم
cleopatra
drfamy
DrKonafa
flona
hafed mohamad
Manamino
safa7 karmooz
sharkawoo
veticohaya
WhiSpeR

and special thx 4 dr.famy & veticohaya

اخيرا قريت اخبار حلوه في الجرايد !!

2007-09-26T16:44:00.000+02:00

السلام عليكم ورحمة الله وبركاته

يااااااه من زمان اوي كل ما اقرا الجرايد ملاقيش الا شيوية اخبار شوفناها 15 مره في الجزيرة وشيوية فضايح و تريقه و شيوية اخبار روتينية و15 شيوية حاجات غير قابلة للقراءة اصلا ومعرفش بتنزل ليه في صفحات ثابته ويوميا
:s

حنقلهم والتعليق ليكم :)

الخبرين في جريدة الاهرام بتاريخ 26-9

نسخة مكبرة اضغط هنا

والتاني

نسخة مكبرة اضغط هنا

ياريت تقولوا ارائكم وتفتكروا ده حيبقى ليه تعليم حقيقي بجد ويطلعلنا احمد زويل مثلا او حتى نص احمد زويل ويطلع يكمل بره عشان يبقى احمد زويل ولا حتبقى شيوية شكليات فقط وحيبقى فيه حاجه اسمها قسم مميز ويادوب كل المميز فيه ان الدكاتره الكويسين بس هم اللي حيدرسوا مثلا لكن بنفس طريقه التعليم تقريبا ونفس المناهج

ياترى العساكر دول حيبقى ليهم لازمه بجد والناس تخاف تسرق او تعاكس ولا مش حيبقى ليهم فايده غير انهم بيعاكسو البنات زي بتوع المرور ويلمو فلوس من بتوع الميكروباصات

اخر الاخبار

2007-09-17T03:07:00.002+02:00

السلام عليكم ورحمة الله وبركاته

ازيكم ياجماعه عاملين ايه ؟ يارب كله يبقى تمام اوي

اول حاجه انا بعتذر عن ان مفيش اي بوستات جديدة نزلت الفترة اللي فاتت بس زي مانتو عارفين الاجازه متعفرته اخر حاجه :s مع ان فيه حاجتين 3 كده كان نفسي اكتبهم في الاجازه بس حكتبهم قريب ان شاء الله

الاخبار بقه

اول حاجه ياجدعان انا نجحت !!!!!!!!! والله نجحت مش مصدق والله :):) يعني لو انت (اقارئ) قدامي وبقوله انا نجحت ححس جوايا اني نفسي امسكه ارجه كده في ايدي وانا بقوله :d

واحنا في المصيف لما طلعت من البحر ببص كده في الاف لافون لقيت حد باعتلي مبروووووووك و انا فرحتلك و عقبال كل سنة ومعرفش ايه وانا منبهه على كل العيال محدش يجبلي سيرة النتيجة وانا مسافر الا لما ارجع عشان السفر ميبوظش
المشكلة الرسالة مكنش فيها تصريح واضح بالنتيجه و كده واصلا انا كنت عايش مع نفسي يعني طول السنة فمتوقع نتيجه بشعه والرسالة بتقول عقبال كل سنة!!

بس بالليل حد اتصل فيا وقالي النتيجة بالتفصيل الحمد لله :)

بجد صباح الفرحة اللي فرحتها وارتبطت خلاص بالمكان اللي كنت فيه

تاني خبر اختي نجحت الحمد لله ودخلت قسم عمارة وده اعلى قسم في جامعتهم ( من حيث المجموع يعني - فصعب دخوله ) وهي كانت عايزه تكون مهندسه معماريه اوي

تالت حاجة بالنسبه للاجازه المصيف اللي روحته مع العائلة الكريمة كان تحففففففه بجد احلى مصيف روحته في حياتي كلها والاسبوع ده والله من احلى الاسابيع في حياتي كلها برضه.. كنا مسافرين مع عيلة خالي وكانت اللمه فظيعة..

بجد اتبسطت جدا وكمان استفدت جدا جدا جدا على المستوى الاجتماعي ( قصدي يعني خدت خبره حياتيه كبيره اوي منهم ) توازي اللي اتعملته طول الاجازه او يمكن طول السنة بجد حسيت اني اتعلمت حاجات كتير اوي اوي في الاسبوع ده

الحمد لله بجد كل الاخبار سعيدة و جميلة :)

رمضان ده بقه بجد دخل فاجاه كده والواحد مش واخد باله خاصة ان شهر 9 ده اكتر شهر بيتحرت في الاجازه كلها عشان الواحد بيدرك ان خلاص فاضل ايام على الدراسة.. فبجد حاسسني مش مستعدله

انصحوني

وكل سنه وانتي طيبين

قطعة صلصال

2007-07-09T05:15:00.001+03:00

السلام عليكم ورحمة الله وبركاته

كان فيه ولد صغير كويس اوي ومؤدب و مجتهد في دراسته.. الولد ده في يوم من الايام عدا على محل العاب كبير جدا وانبهر بيه اوي وانطلق يجري فيه و يتفرج على الرفوف و الالعاب و كل حاجة معروضة..

وفضل كل يوم يروح المحل ده ويتفرج على كل حاجه فيه تاني و يعلب بالالعاب دي ويجرب اللي يعجبه منها.. وكان معظم اليوم بيقعده في المحل ده..

وفي يوم وهو بيعلب في المحل وصل لرف غريب شيوية.. كان اول مره يشوفه.. الرف كان فاضي او هو شافه كدة.. و كان عليه قطعة صلصال لونها ابيض وكانت في علبة شيك جدا ومتغلفه كويس اوي.. وهو انبهر بيها جدا ! المشكلة ان مكنش معاه فلوس.. فراح حاحطها في جيبه و مشي وهو مش حاطط في راسه كده انه سرقها..

اول ما واصل البيت راح وهو مبسوط جداااااا وكل اللي حوليه لاحظ السعاده في عينيه لانهم اول مره يشوفوه كده.. قفل عليه باب اوضته وطلع قطعه الصلصال من جيبه و فتح العلبه وطلعها و قعد يلعب بيها.. وهو في قمة السعادة.. وحافظ على السر ده لنفسه.. كل يوم كان يقفل باب اوضته و يطلع قطعة الصلصال و يلعب بيها..

ومرت ايام كتير جدا جدا جدا وهو مازال بيلعب بيها كل يوم و بنفس السعادة و مازال ماحافظ عليها كانه لسه شاريها جديدة.. لغاية ما يوم جيه و افتكر ان قطعة الصلصال دي هو سرقها من المحل.. وانه مدفعش حقها لصاحب المحل..

ساعتها بدء يضايق.. وبطل يلعب بيها زي الاول.. وكل يوم يضايق اكتر لدرجه ان اهله لاحظو كدة.. في الاخر وصل لقرار انه يروح يرجعها لصاحب المحل و يعتذرله

وفعلا طلع قطعة الصلصال و حطها في علبتها و راح للمحل و كلم صاحبها على انفراد و طلعله العلبة و حكاله القصة واعتذرله بشدة.. وبعدين سابه ومشي..

ومرت الايام تاني.. وكان كل يوم الولد ده بيحوش تمن الصلصال.. ومكنش قال لصاحب المحل انه حيحوش تمنها لانه خاف ميقدرش يحوشه و ميرجعلوش بعد ما يكون وعده بكده.. و فضل يحوش على قد ما يقدر فترة طويلة اوي..

لحد ما فيه يوم الولد راح لصاحب المحل و قلبه قرب يخرج من مكانه من الفرحة و ضربات القلب اللي هو خلاص يعني.. وراح دخل المحل زي ماكان بيعمل وهو صغير.. وعينه على الرف البعيد اللي عليه قطعة صلصاله.. لحد ما وصل ولقاها زي ما هي بالظبط.. ومحفوظه في علبتها و محدش لمسها.. فرح جدا و خدها و راح لصاحب المحل واداله تمنها و طار على البيت وقفل اوضته زي ما كان بيعمل وهو صغير وطلعها من جيبه و خرجها من علبتها وهو فرحان جدا كان ناقص يبوسها :d

وبدء يلعب بيها وهو لاول مره يستحقها.. فعلا حس بحاجه مختلفه وهو بيعلب بيها وهي بتعته كدة.. ورجع تاني في قمة السعادة زي زمان و اهله لاحظو برضه..

ومرت الايام.. وهو محافظ عليها و كل يوم بيعلب بيها بشكل هستيري لا يكل ولا يمل.. لكن دايما وهو بيلعب بيها و بيحاول يشكلها على اي شكل مكنتش بتثبت في ايده.. كل ما يدوس من ناحيه على قطعه الصلصال تنضغط من الحته اللي داس عليها لكن تذيد من الناحية المقابلة.. يدوس على الناحية اللي ذادت منها يلاقيه اتظبطت من الحته دي لكن باظت من الناحية الاولى..

بدء يضايق فعلا لانه مش عارف يكون الشكل اللي نفسه فيه و مش عارف ليه هو مش عارف يعملها..

مسكها تاني.. وداس عليها من اتجاه.. فذادت في الناحية التانية برضه.. وكان اضايق واتعصب اوي من الهدوء الشديد المحيط وهو مش عارف يعمله.. فلما ذادت في الاتجاه المقابل راح قاطع الجزء اللي ذاد.. وبعدين بدء يدوس في مكان تاني راح ذاد انضفط برضه و الاتجاه المقابل برضه ذاد راح قاطع الذيادة برضه..

المشكلة انه زمان لما كان بيسيب قطعه الصلصال كان المحيط الخارجي بس هو اللي بينشف شيويه لكن الباقي بيفضل سليم.. ولما يبدء يلعب بيها كان بيعجنها شيويه فترجع سليمة.. لكن لما بدء يقطع منها اتكونت اجزاء كتيرة وكل جزء منها كل المحيط الخارجي بتاعها يينشف مع الوقت.. فكان بيكون صعب يرجعها زي الاول

فوقف عشان يحافظ عليها.. وسابها زي ما هي.. وكان يقعد يبص عليها وهو مش عارف يعمل ايه.. جرب مليون طريقة عشان يعملها ومش عايزه تتظبط.. فهو سابها زي ماهي لكن مرجعش يلعب بيها كتير زي زمان.. وكل ما يمر الوقت اكبر كل ما يقل لعبه بيها اكتر.. ونسي انها بتنشف ولازم يعجنها كل شيويه عشان يحافظ عليها..

ففيه يوم وهو بيتفرج على البوم الصور بتاعه شاف صوره وهو صغير و قعد يستعيد ذكريات كتير جدا.. منها لما كان بيروح المحل ويجري فيه ويلعب باللعب و قطعة الصلصال وكل حاجة.. راح قفل الالبوم و قام طلع قطعة الصلصال.. لقاها نشفت جدا لانه بطل يعجنها تقريبا..

اضايق جدا جدا.. ومعرفش يعمل ايه لاول مره في حياته.. حاول يلعب بيها زي الاول.. لقاها بتتشقق منه.. ولو سابها حتنشف اكتر واكتر.. عمل حاجات كتير اوي لكن كل مره كانت المحصلة ان الصلصال بتبوظ اكتر.. وهو يضايق اكتر واكتر..

لحد ما لقاها شبه باظت تماما منه.. فقرر يعجنها كلها على امل ان يكون جواها سليم لسه..

عجنها بحرص شديد.. اتقطعت منه نصين..

لكن لقاها من جوها فيه صلصال سليم.. فرح جدا.. وقال انها ممكن ترجع زي زمان.. واستمر بحماس شديد جدا يعجنها.. لحد ما وصلها اخيرا انها تكون من بره سليمه تقريبا.. كانت الفرحه مش سايعاه بجد..

لكن طبعا كانت نشفت عن الاول بمراحل ومش طرية زي الاول.. وده صعب جدا انه يقدر يلعب بيها او انه يشكلها او اي حاجة.. وكل ما يعدي وقت كل ما المشكلة تذيد..

فضل مضايق جدا.. ومش عارف يعمل ايه تاني.. واثناء ماهو بيتمشى مره.. اكتشف انه سابها عن صاحب المحل فتره اكبر من الفترة اللي قعد بيلعب بيها.. ومع ذلك لما خدها من صاحب المحل في المره التانية كانت سليمه و جديدة ومفهاش اي حاجه لكن لما لعب بيها اتشققت و بتبوظ منه..

في النهاية.. قرر يرجعها ويسيبها لصاحب المحل.

ملحوظة.. دي مش قصة.. ولا ليها اي طابع قصصي.. ولا اعرف ازاي اكتب قصة اصلا ومش بحاول يعني اكتب قصة لانها مش قصة اصلا..

صورتهم في الازهر بارك

2007-07-06T21:00:00.003+03:00

السلام عليكم ورحمة الله وبركاته

ازيكم ياشباب عاملين ايه وايه اخبار الاجازة معاكم؟ يارب تكونوا مبسوطين و بتستغلوها

من كام يوم كدة روحنا الازهر بارك انا وشلة الانحراف ودي كانت اول مره لينا.. بجد ياجماعه ما شاء الله ! تحفه بجد !! واسعة اوي و جميلة و مساحات خضراء كبيرة اوي ماشاء الله. اكبر جنينه في مصر متهايلي.. الناس هناك كويسة جدا ة فيه امن كتير فحت و محترمين جدا برضه وشايفين شغلهم كويس اوي بجد عشان البنات متخفش يعني عشانها واسعه اوي كدة.. و نصهم عرب واجانب :)

دي شيوية صور صورتها هناك يارب يعجبوكوا ولو اي حد عنده ملاحظات او نصايح مثلا ياريت يقولي جزاه الله خيرا عشان معرفش في تقنيات التصوير والحاجات دي

المشكلة هناك ناس كتير اوي اوي رايحة لغرض التصوير بس ومعاهم بقه معدات كتير و الكاميرات الكبيرة دي وعدسات وايد انجل وحاجات جامدة كدة ماشاء الله فالواحد حس بضائلة صورة :d

ابقوا قولولي ايه احلى صورة عجبتكم

Azhar park's photos:-

1st album

2nd album

Flash Show

*

الصور دي متصغرة حجما و رزليوشانا وكل حاجة عشان الصورة الواحدة كانت

:s حوالي 2 ميجا ونص

..متاكد انها موجودة

2007-06-27T20:54:00.001+03:00

السلام عليكم ورحمة الله وبركاته

اكيد معظمنا شاف فيلم اكس - مين.. فاكرين لما كان البروفيسور دخل البتاعة بتعته دي و حاط الجهاز على راسه عشان يدور على كل البشر اللي على الارض ؟ فاكرين كنت متصورة ازاي وكانت عامله ازاي وهو بيشوف البشر دي ؟

انا بشوفها كدة.. بتخيلها دايما بالشكل ده في راسي.. الظلام في كل مكان.. وهي في النص وعليها هي بس ضوء.. وبتخـيـلها بتعمل حاجات كتير اوي.. بتتكلم في التلفون.. بتاكل.. قاعدة بتسرح شعرها.. قاعدة مع صاحبتها و بتكلمها.. بس حاسسه بفراغ جواها وانه ناقصها حاجه مهمة اوي..

انا متاكد ان البنت دي عايشة بجد وانها احسن واجمل بنت في الدنيا في عينيا.. وبجد متاكد اني حقدر اسعدها واخليها اسعد بنت.. وهي كمان عارف انها حتسعدني في الدنيا و تكون حور عيني في الاخره

..متاكد انها موجودة بجد و مستنياني ونفسها الاقيها زي ما نفسي اوصلها

انا بقعد ادعيلها بجد ان ربنا يكرمها ويحفظها.. ويحافظلي عليها.. و يباركلنا مع بعض

:) يله اللي عايز يتريق يتريق بقه مفيش نفسنه يعني خدوا راحتكو مش بزعل بجد

الاجاااااااازة

2007-06-24T23:50:00.000+03:00

السلام عليكم ورحمة الله وبركاته

اول حاجة انا بعتذر جامد جدا عن التاخير الفظيع ده بسبب الامتحانات وكمان بعد ما خلصنا الفاينال جابونا نمتحن ميد ترم !! عامة الحمد لله اننا خلصنا

المهم الاجازة جت ياجدعان!! انا مش مصدق بجد !! فين لما كنت بقول يا ااااااه فاضل لسه شهر ونص امتحانات امته يفوتوا واخد الاجازة 3 شهور ! وكنت عارف انهم حيعدوا بسرعه.. بس كنت عارف برضه انه سيتم نفخي
:s
الحمد لله

..المهم دلوقتي الاجازة جت من يومين وكدة فل اوي بس يارب اعرف استغلها عدل ومضيعهاش في الهلس بتاعي ده

بالنسبة للخوطط الخمسية هو كنت ناوي اخد كورس الماني لغتي المفضلة في معهد جوته بس قالوا ان اول حجز حيبقى في 8 فقولت اخد عنجليزي اهو افيدلي برضه.. فكنت محتار بين الجامعة الامريكية و البريتيش كاونسيل
بس عيب البريتيش كاونسيل اني نطقي حيبقى معاق وكمان اختي قالتلي انه بيبقى 4 مرات في الاسبوع المره ساعتين و نص تقريبا صباح الطحن يعني لكن الاه يو سي كان بيبقى مرتين حسب ذاكرتي و الوقت اقل كتير..
بس اتصلت بالجامعة الامريكية قالوا برضه الكورسات في شهر 8 حسب ذاكرتي.. فاما استنى واخد الماني احسن واما اروح البتاعه المعاقة بس سمعت اوشاعات انهم ممكن يكونوا بيدوا اميريكان انجلش فقشطة حشوف

وكمان عايز حاخد كورس في زدني و ده حلو عشان مره في الاسبوع ساعتين تلاتة

كدة فاضل حاجتين..

C++ ICDL حاجات الكومبيوتر.. عايز اخد شهادة وعايز اتعلم
وللكلية عايز اتعلم اوتوكاد ( اكيد مش حاخدهم كلهم بس حختار من دول يعني )
وعايز اخد تدريب صيفي وده بيبقى شهر مفحوت لوحده

اخر سطر: وعايز اروح الجيم و حاجة كمان ملكمش دعوة بيها واقرا الكتب اللي جبتها من معرض الكتاب بتاع اخر سنتين ولا بتاع
:s

طيب نحسبها بقه
نقول اللغه يومين و زدني يوم و الكومبيوتر اقل القليل يومين كدة 5 ايام والتدريب وده شكلي غالبا حنفضله لان لو روحته بياخدله شهر كامل و كل يوم تقريبا و بيبقى معظم اليوم في الموقع وباقي اليوم برجع من الموقع :s
ده غير اخر سطر!!

اصل السنة اللي فاتت او بمعنى ادق السنين اللي فاتت مكنتش بعمل حاجة مفيدة تقريبا الا الانحراف :s فعايز اعوض بقه

بس واخيرا بعد الرغي اللي فوق ده عايز انحرف والسفر اصلا ده معرفش حسافر امته كدة!! كمان مشكلة الكورسات انهم متنتورة مش مثلا افحت نفسي اسبوعين واخلص..

بس ربنا يستر ادعولي بقه استفاد بالاجازة و مكسلش عن حاجة عايز اعملها واستفاد من اللي بعمله و ربنا يكرمني :)

مبارك عليكم

2007-05-27T20:06:00.000+03:00

بسم الله الرحمن الرحيم

حبيت اهنيكم ياجماعة بالبلوج بتعتي اللي لسه عاملها
..بس ياريت بلاش هجوم يعني.. واحد واحد.. رد رد