فضائح طقووس الامتحانات.. الجزء التاني

السلام عليكم ورحمة الله وبركاته


الجزء التاني ده بقه حكلكم عن طقوس ايام الامتحانات بتاعة صحابي وزوار المدونة الاعزاء  زي ما اتفقنا ف الجزء الاول :)


مكان المذاكرة برا البيت

دي احد الحاجات الاساسيه المرتبطه بوقت المذاكره عند الناس.. اللي هو من اهم الطقووس المذاكرة في مكان معين.. ومعظم الناس بتذاكر ف اماكن اوضاع غريبه جدا..

  • يقول legend: انا ليا واح د صاحبى بيغطى عربيته وبيدخل جواها وينور شمعة ادام وشمعة ورا ويملا العربية ورق وملازم وكتب
    ويبدا يذاكر وممكن ميطلعش من العربية غير تانى يوم

  •  ويقول لاسع افندى: 
    اغرب حاجه عملتها انى رحت اذاكر فى محطة السكه الحديد اه والله محطة اسيوط رصيف واحد والحمد لله نجحت
    بس نصيحه اللى رايح يذاكر فى المحطه يذاكر جنب قطر درجه اولى علشان يجيب تقدير حلو


مكان المذاكره جوا البيت

 والجميع اجمع انه لا يمكنه المذاكره على المكتب :)

  • ليا واحد صاحبي مبيعرفش يذاكر الا في البانيو !!
  • تقول semsema: مع دخول الامتحانات الموبايل مش بيفارقني ثانية واحدة.. وباخد عدتي واتجه الى اوضتي تحديدا ع السرير (الدور التاني) العدة مكونة من الآلة الحاسبة والمقلمة وكتاب المادة وطبعا بيلحق بيهم بعد كدا كوب النسكافيه.. المكتب بيكون مهجووور ايام الامتحانات..

  • ويبدو ان موضوع المذاكره على السرير ده منتشر عشان eng: nagwa قالت: من اهم طقوس مزاكرتى انى مش بزاكر غير علي السرير ولما بزهق بقوم اتمشي في الاوضه وبحفظ بصوت عالي
    وعندى بنت جارتى عندها سنتين ونص ما شاء الله بغبغان بيردد ورايا :D

  • انا فاكر ايام اخر شهر بتاع 3 اعدادي تقريبا كنت بحب اطلع حاجه زي كومدينو صغير كده في البلكونه و احط كرسي واقعد اذاكر في الهواء الطلق اثناء شرب الشاي

  • قالت زهرة الجبل: لما بكون بذاكر من مادة ليها ورق (ودى نادرة),, بفرش الورق حواليا على الأرض وأندمج بقي 

  • وتقول موناليزا: ليا واحدة صاحبتى كانت بتذاكر فى الحمام اول ماالامتحانات تبدأ المغص يشتغل فتاخد الكتاب وعلى الحمام
    وتتحدث عن نفسها فتقول: انا كنت بذاكر يإما فوق ترابيزة السفرة يا إما تحتها لكن ماعدتش طبيعية كده على الكرسى

  • وتتفق معاها Soul.o0o.Whisper  حيث قالت: أنا مش بيحلى لى المذاكرة الا لو طلعت استربعت على المكتب من فوق :)
    و ايام ثانوية عامة حطيت اللحاف فوق الدولاب و المخدة و عملت قعدة ظريفة و بئيت أذاكر فوق الدولاب
    و لا ماما .. فرجت عليا العيلة كلها





الاكل

وده برضه بيتغير ايام الامتحانات بشكل غريب..

  • ليا واحد صاحبي قالي في ليلة امتحان فانيال دماغه تربست وطلبت معاه ياكل حاجه مش فاكرها كده بس مش منتشره يعني.. ونزل الساعه 1ونص بالليل ولف مصر كلها على محل يكون فاتح وبيبيع.. وملقاش غير في مكان بعيد جدااااااااا وبعد وقت طويل !!

  • تقول موناليزا: ليا واحدة صاحبتى بتحب تذاكر فى المطبخ عشان تبقى جنب الاكل بدل ماتفضل راحة جاية على المطبخ استقرت فيه
  • وشاركت معنا دكتور أروى @ :هى الحاجة الغريبة اللى بتحصل لى انى ببقى عايزة آكل اصناف معينة ، واعمل ف البيت حكابة عشان الحاجة ديه 
    قال يعنى خلاص هى اللى لما آكلها هذاكر احسن

  • اما مشاركة Bent Men ElZaman Da !!: فى ثانوى كنت بأكل كتير اوى
    لدرجه انى مره كلت نص بطيخه لوحدى لحد ما بقيت شبهها ههههههههههههههه


اخرى

طبعا من اهم الحاجات والطقوس المتلازمه مع الامتحانات ان الواحد بيكتشف ان كل حاجه مهمه في الحياة الا المذاكره.. فبيكون عنده قدره رهيبه على تاجيل المذاكرة

  • وتتفق معايا زهرة الامل فتقول: يبقى من أول اليوم وإنى كل شويه أقول قايمه أهو بس هاخلص كذا الأول 
    وكذا دا مبيخلصش ..
    عموماً أيام الإمتحانات بنفتكر اللى عمرنا مابنفتكره فى العادى ونقعد نطلع بحجج وحجات غريبه كدا
  • واحد تاني ودي استغربتها جدا.. قالي انه بيقلع هدومه وهو بيذاكر :D 
    واللي اندهشتله اكتر اني اكتشفت انها ظاهره مش واحد بس.. فيه 2 تقريبا قالو كده.. واحد منهم بالملابس الاحم احم خاصه.. والتاني من غير :d
    ضحكوني اوي بجد

  • واحد صاحبي بيفك كارت الشاشه يوديه عند عمه اللي ساكن في اخر الكره الارضيه بالنسباله عشان يبعد عن الكومبيوتر + يغلي اشتراك النت الفتره دي.. وواحد تالت بيفك كابل الباور ويطلع يرميه من الشباك !

  • قالت زهرة الجبل: بربط الحاجات اللى بذاكرها بقصص ومفاهيم عاديه الناس بتستخدمها أو أنا بخترع لها كلمه كده يعنيواخواتى واصحابي بيتريقوا عليا

  • وتقول Semsema: يعني مع دخول الامتحانات الموبايل مش بيفارقني ثانية واحدة المسجات (دا ان مكانتش مكالمات) مش بتبطل لازم نطمن ان كلنا لسة مخلصناش كل خمس دقايق وحدة تتصل او اانا اتصل بيها
    انواع الاحباطات بئا .. احنا مش هنلحق نخلص .. انا هروح الامتحان مش مخلصة .. حاسة ان الامتحان جاي صعب .. مش فاكرة حاجة من اللي ذاكرتو

  • وضحكني اوي Manas: من النوادر انى كنت بذاكر انا واصحابى على النت
    نفتح الايميل ونعمل كونفرنس ونشغل المايك ونعيش 



بس كده :) 

واشكر كل اللي ساهمو بمشاركتهم وقصصهم الرهيبه دي :)

ولو حد تاني حابب يشارك باي طقوس يبقى يكتبها ف التعليقات وحبقى احدث الموضوع هنا ان شاء الله :)

الامتحانات.. فضائج الطقوس وطقوس الفضائح

السلام عليكم ورحمة الله وبركاته


جدول الامتحانات نزل وفاضل اسبوعين !! يانهار اببببببببييض.. بسرعه قوم اعمل احصاء للمنهج وشوف كل ماده كام ملزمه ومتوسط عدد ورق الملزمه الواحده وبتخلص ف اد ايه وبعدين اعمل جدول بسررررررررررررررررررررعه 

لما اشغل الكومبيوتر شيويه اتسلى وانا بعمل الجدول.. احط اي حاجه شغاله اسمعها.. 

ايه ده ايه الايميل ده.. لما اقراه في السريع..
يانهار ابيييييييييييييض ايه الايميل الفظيع ده !! ( وهو مجرد ايميل فورود اصلا ) لا لا لازم ارد على اللي بعته واشجعه واقوله انه ايميل رائع.. مانا لازم يبقى لي دور ايجابي طبعا !! مهو ممكن يحبط لو محدش عبره كالمعتاد.. 

طب لما ابص على الاخبار في مصراوي في السريع عشان اقوم بعدها.. 
يلهووووووووووووووووي شوفتو !! مقتل طالب امريكي على يد زميله في الجامعه في ولاية معرفش ايه !! لا ده انا لازم افتح المنتدى بسرعه واحكيلهم عن القضية الخطيره دي وتاثيرها على المجتمع المصري ودورنا المفروض نعمل ايه ونلحق نتصرف ولا اي بطيخ..

فين وفيييين.. لما اعمل الجدول بقه.. 10 دقايق الجدول خلص..  بعد حوالي 3 4 ساعات ضاعو في ولا شئ واحنا طول السنه منحرفين انحراف عالمي اصلا وابيض ياورد 
ياااااه الساعه بقت 7 
لا انا بقه حذاكر من بكره عشان ابدء اليوم من اوله بنشاط واحس واخد على اني بنجز من الاول كده.. مش يكون النتيجه النهائيه في المحصله ساعه في اليوم فاخبط.. فبكره ان شاء الله اصحى بدري وانجز..

طب طالما حبدء مذاكره بكره.. فانا اعمل كل اللي نفسي فيه على النت بقه عشان اشبع منه.. والمفروض بنام 1 2 مثلا فافضل سهران لتاني يوم الصبح !!

اصحى تاني يوم الضهر العصر.. لا لا لازم اتغدى الاول عشان ابقى مركز وانا بذاكر لما اذاكر.. لما استنى الاكل بقه والقي نظره على النت..
اوباااااااااااااااااااااا ده فيه واحد قالي جزاكم الله خيرا في الموضوع بتاع المنتدى بتاع البارح ! ده انا لازم اناقشه في راييه الرهيب ده ونتجاذب اطراف الحديث ونشوف نقط الخلاف والاتفاق ونتناقش يعني !!

وبعدين الغدا.. وبعد الغدا طبعا لازم الحلو.. ولازم الفاكهه.. وبعدين عصير فريش.. وبعدين ممممم لما اخد دش عشان انتعش.. وبعدين يانهار ابيييييييييض بقه محمد اللي بيرنلي كل يوم ده 10 مرات رنلي !! ده اكيد فيه موضوع مهم وكان عايز يتكلم معايا فيه !!!!  

الووووو ها يامحمد احكيلي قصة حياتك اخر 10 سنين من ساعه ما شوفتك بعدها كل يوم تقريبا !! بس بالتفصيل لو سمحت.. 
طب ياحاج محمد كده الرغي ده كله :@ مش عارف ان عندي امتحانات و انا ضايع وفاضل اسبوعين !! يله خش على المسنجر نكمل الموضوع ده عشان ابويا عايز التلفون

وبعدين تاني يوم خلص اهو بدون اي محصله.. طبعا معروف.. اسهل حل امسك الجدول اضغطه شيويه عشان تحذف اليوم منه.. واصلا الجدول غير بشري لاي حد !! يعني محطوط فيه حاجات لا تصدق عشان تتنجز في الاحلام بقه !! 
خلصنا الجدول الجديد ؟ طب انا اشيل المكتب واحطه قدام السرير ( احد الطقوس ) عشان اصحى بكره الاقيه كده واتشجع واتلم وابقى فاكر ان عندي امتحانات وابدء مذاكره.. 
وبعدين لما اشبع  من النت بقه عشان ابدء بكره بضمير

وهكذا الى ما لانهايه :s

هداني الله واياكم :)

انتظرو الفضايح والبلاوي في الجزء التاني ان شاء الله وحتكون عن الطقوس الغريبه جدااااااا اللي عرفتها من صحابي انهم بيعملوها وقت الامتحانات.. 

مثال: واحد مبيذاكرش غير في البانيو !!

فياريت لو كل واحد عنده طقوس غريبه للامتحانات سواء هو او صحابه ويحب يشارك بيها.. يبقى يكتبها في التعليقات في الموضوع ده.. وفي الجزء التاني ان شاء الله حكتبها باسمه طبعا :)


ملاحظه: بشمهندسه نجوى "ENG:NAGWA" هي اللي اقترحت عمل البوست دي :)