بدون معلم: كيف تحصلين على الجسم المثالي :D

السلام عليكم ورحمة الله وبركاته

سيدتي هل تحلمين بالحصول على الجسم المثالي ؟
هل تريدي ان فقدان بعض الوزن دون اللجوء الى ممارسة الرياضة ؟
هل تريدين الحصول على "تان" على بشرتك ف اي وقت دون الذهاب الى المصيف ؟
هل تحلمين بدخول كلية الشرطة لمجرد تجربة القفز من اعلى المسامير والمناورات بينها وتفادي المواد المتساقطه من الاعلى على راسك او احتمال سقوط اجسام ضخمه عليكي في حال حدوث اي خطأ اوالصعود الى اماكن شديدة الارتفاع ف اساسانسير متعلق من طرفه على عمود واحد ؟!!
هل تريدين رفع لياقة جسدك بعيدا عن المواظبه على السويدي ؟
هل تكرهين الجلوس ف السونا و تريدين ما يحقق لكي نفس النتيجه ؟
هل نصحك بعض الاطباء بعمل ماسك من الاتربه كما ف الصين ولم تستيغي التجربه مع الرغبه ف تنفيذها ؟
هل تودين غسيل جميع ملابسك يوميا من الاتربه والاسمنت للتاكد من جودة صناعة الماركات العالميه ؟
هل تريدين اختبار قوة تحملك لضربات الشمس قبل الطلوع ف سفاري مع بعض الاصدقاء ؟

الان.. يمكنك تحقيق كل ذلك ف خطوة واحدة...
التدريب الصيفي لمهندسي مدني !!!!!

طبعا ده عباره عن "بعض من كل" :s:)

دي اول سنه انزل تدريب صيفي وصراحه حاجه جميله جدا

احنا عندنا ف مدني فيه مهندسين تصميم و فيه مهندسين تنفيذ.. التصميم دول مهندسين قاعدين ف مكاتب على كومبيوترات ( زمان كان على لوح الرسم ) وده اسمه مكتب استشاري

والتنفيذ دول اللي بينزلو مواقع.. بيكون فيه عمال بيشتغلو.. وعلى العمال بيبقى فيه مشرف عمال.. وعلى المشرف بيبقى فيه مهندس مقاول.. وبيبقى متابع العمال نفسهم طبعا برضه.. وعلى المهندس المقاول ده بيبقى فيه الاستشاري..
وده اللي انا نازل ادرب معاه.. اللي هو استشاري ( شغله مراقبه التنفيذ وكده )


هو المفروض مفيش الكلام اللي انا كاتبه فوق ده (بتاع الحصول على جسم مثالي :D ) يعني الاستشارين بيقعدو ف اوض مكيفه.. وبينزلو الموقع كذا مره بس لما يكون فيه request لاستلام حاجه من المقاول


لكن عشان انا لسه بتعلم وكده فمبحبش اقعد ف الاوضه.. ف 24 ساعه واقف ف الموقع حتى لو الاستشاري اللي بدرب معاه رجع الاوضه

باي حال من الاحوال التدريب مهم جداااااااااااااااااا ومفيد الى ابعد جدود.. حتى مجرد الجلوس ف الاوضه ومتعملش حاجه حتستفيد جدا.. لان 24 ساعه فيه مواقف بتحصل كتير جدا وبتتعلم منها..

مثلا: كان فيه ف احد اللوح مسافه ناقصه ومش لاقينها انا و الاستشاري.. هو بص فيها 10 ثواني بس.. وبعدين رفع التلفون واتصل ف المكتب عشان يسال المصمم على البعد ده يطلعه من الكومبيوتر علطول
انا لو مكنتش شوفت الموقف ده وكنت بشتغل ومش لاقي مسافه على اللوحه اكييييييد كنت حقف على حواجبي عشان اطلع البعد ده.. لاني كنت حبقى مفكر انها اهانه اني مهندس ومش عارف اطلع بعد مش موجود !! حتى احسبه to scale من اللوحه
لكن الاستشاري ( عنده 49 سنه و خبره 26 سنه !! ) ف ثانيه مترددش انه يسال عليها علطول...


ده مثال صغير بس لان بدون ما تعمل حاجه ولمجرد القعاد والله حتلاقي نفسك بتستفيد وبتتعلم حاجات كتير مش حتتعلمها ف الكليه ابدا


انصح بشده بشده اشده بضرورة التدريب اي كان مجالك لانك حتتعلم شغلك الحقيقي.. وحتلاقي نفسك بتحب العلم اللي بتدرسه ف الكليه اكتر لانك بتشوف فايدته وتطبيقه قدامك و حتحس نفسك بتنجز وبتعمل حاجات باللي اتعلمته ومستفيد منها فعلا.. فلما ترجع الكليه حتبقى عايز تتعلم فعلا.. مش بتتعلم لمجرد تخلع وخلاص


حبقى اكتب تاني ان شاء الله عن التدريب اللي واكل معظم الوقت

39 Responses
  1. مع اني مش فاهمة كام حاجة كدا ..

    بس ويلكم باك يا باشمهندس ..

    وان شاء الله لما اخلص مدرسة..

    واقرر هدخل جامعة ولا لا ..

    هأتدرب واستفيد ^-^


  2. Me7'o Says:

    ^ ^
    *____*

    حلو المنظر ده
    ______________

    أنا أول ما عرفت اسم المدونة دخلت عليها على طول علشان أشوف مين اللى بيزق ده
    والله واول ما فتحتها قلت ده أكيد مهندس مدنى

    وكده تبقى تمام

    والكلام اللى إنت كاتبه فوق التعليقات ده بيقول إنك مشاكس جداً جداً جداً

    علشان كده إن شاء الله هاتبقى مهندس موقع ناجح جداً جداً جداً

    تحياتى


  3. εïз Semsema εïз

    ايه حقرر ادخل الجامعه ولا لأ دي ؟
    هو ايه راي حضرتك ف الموضوع ده


  4. Me7'o

    ياسلااااام عليك يارافع معنوياتي يامصيتني :D
    ربنا يكرمك يابشمهندس :)

    واهلا بيك شرفتنا ف البلوج :)


  5. هههههههههه

    طب ماينفعش اجي انا اصلي عايزه اعمل حجات من دي يعني :))

    والله ربنا يعينك ياطارق ايه الحجات دي كلها

    الحمدلله انا مش ف هندسه ولا مهندسه ولا ناويه يبقى ليا علاقه بالارقام اصلا :))

    ثلامو بقى


  6. وعليكم السلام ورحمة الله ..

    بالنسبه للمقدمه فبصراحه حسيتها كإنها معلومات مطروحه في صيغة أسئله
    عجبتني الطريقه ..

    بالنسبه لأول نقطه
    أنا لو عليا مبحبش شغل المكاتب وأستنى على ما يجيلي شغل أعمله
    بحب الشغل إللي فيه حركه وتنطيط وبهدله
    رغم إن شغل المكاتب بيحتاج لطاقة ذهنيه عاليه فعشان كده مش هقدر أكون كفء فيه طول الوقت لأن أوقات مخي بيقف وقفه سوده فبالتالي شغلي هيقف أو لو اشتغلت فهيكون مش راضيه عنه فإللي بقدر أنجز فيه أي حاجه عمليه أكتر وفيها حركة وشغل بالإيد والدماغ وكله بيعتمد على كله

    بالنسبه للنقطه الثانيه فده أكييييييييد جدا جدا جداااااااا
    التدريب والكورسات والحاجات دي بجد بتفيد جدا أكتر كمان من إللي بندرسه في أوقات كتير حتى لو الواحد بيتفرج بس الفضل إن الواحد يشتغل بنفسه لأن ده بجد بيكسب خبرة ومهارة أعلى
    لأن الغلطات إللي الواحد هيغلطها في وقت التدريب مسموح بيها غير لما يكون ده شغله فهيتحمل مسؤولية كل حاجه وكل هفوه تحصل محسوبة عليه ..

    بجد حاسه بإحساس حضرتك لأني جربته من السنه غللي فاتت متعه حقيقيه بغض النظر عن الضغط العصبي والنفسي والتعب الجسماني وقلة النوم وحاجات رهيبه بتحصل ..

    بالتوفيق يا بشمهندس ..


  7. انت فين يا عم طارق

    مختفي من المنتدى وموبايلك مقفول

    ولا مسنجر ولا فيس بوك


    صدق اللي سماك المخفي -_-


  8. متفقة معاك جدا فى اهمية التدريب العملى


  9. mimi Says:

    عمنا وعم الجديد كله

    ألف حمد الله علي السلامة

    انت المفروض قلت هترجع بعد الامتحانات

    راجع بعد النتيجة؟

    طب كنت فين؟

    عموما نورت الريدر بتاعي تاني

    وحشتناااااااااا


  10. mimi Says:

    تم حفظ تعليقاتك وستكون معروضة بعد موافقة مالك المدونة الإلكترونية


    كل حاجة في الزمن اتغيرت في غيابك

    إلا الجملة دي


  11. MǿиY El-Shreef

    اهلا وسهلا يافندم :)

    حوقفكم على سقاله على ارتفاع 11 دور وابقى قابلوني لو حد نزلكم

    وربنا يوفقك ف اداب ان شاء الله :)


  12. فيت دعاء

    تمام جدا النقطه اللي قولتيها بتاعه ان الغلطات مسموحه اثناء التدريب
    يعني ف الاخر انت طالب وبتتعلم اصلا.. فلاصل انك حتغلط يعني طبيعي.. ومفيهاش حاجه تنتقص منك..
    لكن لما تشتغل.. بعد فتره بسيطه الناس حتبقى مستنيه حتقول ايه بتتصرف ازاي و بتحل المشاكل بايه و..و..
    فالتدريب ده مهم جدا فعلا


    ابقى احيكلنا عن تدريبات حضرتك برضه


  13. أحمد كمال

    حاج كوكو كيفيك ياجميل
    مش مختفي ولا حاجه يعم.. مبخشش المنتدى بس
    على فكره ياحاج مبقفلش موبايلي ابداااا الا بالليل لما انام..

    ممكن يكون فصل شحن مره ولا بتاع

    وانت عامل ايه واخبار اجازتك ايش
    ونتايجكم طلعت ولا لسه


  14. موناليزا

    شرفتينا يافندم :)


  15. mimi

    :D

    لا والله النتيجه حتى لسه مطلعتش

    بعد الامتحانات دخلت ف التدريب :d

    بعتذر عن متابعتي شديدة التقطع للمدونات :)

    شرفتينا يافندم :)


  16. السلام عليكم :)

    ربنا يكون في عونك يا باشمهندس ,, أنا عندى تدريب صيفى برضو فى الطب الشرعى والسموم ,, بس من نوع آخر تماماً ,,

    --

    بشتغل على المخدرات :D , كان معايا حشيش النهارده

    لكن فعلاً التدريب العملى دا مهم جداً

    هو دا الدراسه الحقيقيه مش النظرى

    ---

    ربنا يوفقك إن شاء اللـه


  17. sh!ko Says:

    السلام عليكم ورحمه الله وبركاته ،،

    حلوه المقدمه دى :D
    اولا ربنا يعينك على التعب ده
    بس تعب بفايده :)

    ثانيا كلامك صح جدا اى احتكاك بس بشغل عملى بيدى خبره ولو 1%

    انا اهو نزلت يوم واحد عشان اشوف مكان تدريبى ومش كنت طايقه نفسى من الحر

    بس بجد متحمسه جدا للتدريب ده
    مع انه مش فى مجال دراستى

    بس هيدينى خبره
    هيعرفنى على الاقل بحاجات تانيه :

    انضباط الوقت
    ازاى اتعامل مع رؤساء
    غير التعليم نفسه بقى :D

    بس كفايه رغى ومنتظرين فضفضه تانى عن التدريب وابقى انتظروونى انا كمان :D


  18. أنا كتبت مره عن أحداث حصلت في الفتره إللي نزلت فيها التدريب وتقريبا حضرتك علقت عليها كمان على ما أتذكر !
    كانت فتره ممتعه جدا بس كان نفسي أستفيد أكتر من كده وأكتر حاجه كانت عجباني إن وقتي كله بيكون مشغول في حاجات مفيده كنت بنزل من البيت الساعه 7 الصبح وأرجع البيت الساعه 11 أو 12 بليل على ما بأخلص وأوصل البيت وكان دكتور كمان بيقولنا المفروض نواصل 24 ساعه بس طبعا صعب عشاننا بنات

    صحيح كنت عايزه أسأل حضرتك بالنسبه للموقع إللي حضرتك بتنزله بتختاره بنفسك ولا هم إللي بيفرضوا عليكم مواقع محدده !
    وهل ينفع لو حضرتك تلاقي موقع فيه شغل وتنزل مع نفسك وتستأذن مثلا من المهندسين إللي هناك بحيث إنك تستفيد منهم وتتدرب معاهم وكده ولا ايه !


    ايه أخبار النتيجه !!!


  19. كنت عايزه أسأل بعد التدريبات دي بيكون في امتحانات زي عندنا ولا ايه النظام !!


  20. صراااحة انا اتعلمت كتييييييير اووي من التدريب البيطري المبجل,,,

    ازاي تضيع وقتك من غير فايدة
    ازاي تستثمر الاجازة في الاسمرار وانتقاء اللون البرونزي الي تحبه
    ازاي تروح العباسية ومدينة نصر واخر فيصل واخر الهرم
    ازاي تصرف فلوسك على المواصلات ولزوم اليوم والتوهاان
    ازاي تعمل شوبينج من الاكشاك الي في شارع نادي الصيد ده بما اننا بناخد التدريب في مركز الصحة هناك
    ازاي و ازاي وازاي

    واهم حاجة في ازاي رحلة مصنع العلف لاسماعلية
    4 ساعات رايح عشان الاتوبيس تااه ونص ساعة شرح وربع ساعة نشوف المكن , الي يعني هنستفيد اني اشوف غرفة التحكم , وزجاجة بيبسي سوخنننة و رحلة العودة في 2 ونص

    بالنسبة للعلم لم يضيفلي حاااجة غير انه ضيعلي الاجااازة وضيع فرص قيمة عليا


    اكيد تجربة عن تجربة في اختلاف
    المهم انك اتعلمت واستمتعت,,,,
    :)


  21. زهرة الأمل

    وعليكم السلام ورحمة الله وبركاته

    استاذه زهرة المختفيه من فتره !!
    فين الغيبه
    ان شاء الله نشوفك لما التدريب يخلص زي زمان


    ماشاء الله ايه التدريب الحلو ده :d
    اكيد كله ولاد والناس بتتخانق عشان تخشه :d

    مينفعش اجي اذاكر معاكو شيويه


  22. ❣sh!ko❣

    وعليكم السلام ورحمة الله وبركاته

    الدكتور القصاصة ( من يروي القصص ) :)


    وفعلا زي ماقولتي حتى لو مش حتتعلمي حاجه خالص منه تبع دراستك.. برضه حيفيد ف الشغل ف كذا حاجه زي ما قولتي

    ننتظر تقراريك عن تدريبك :)


  23. εïзأنا التيεïз

    ليه يعني !!
    تطبقو 24 ساعه ف التدريب !!
    هو فيه عمال اصلا ولا اي حاجه شغالين شيفتات 24 ساعه ف اي موقع دلوقتي
    غريبه اوي دي
    ولا من منطلق يعني ان بقره ممكن تولد ف اي وقت.. وبالتالي المفروض تستنو اللحظه دي ( مش بتريق :D )


    بالنسبه للتدريب طبعا حسب المكان وحسب حضرتك رايحاه ازاي

    يعني ممكن تدريب تبع الحكومه عادي ف شركة المقاولين العرب.. ودي بيبقى المكان هم اللي بينقوه + فيه امتحان

    وممكن تنزلي تتدربي ف شركه ليكي فيها اي حد.. وساعتها انتي اللي بتنقي الموقع الاقرب لبيتك مثلا او اللي فيه شغل حيفيدك..
    وده مالوش امتحان.. انتي بتعمليه لنفسك اصلا يعني وهم مش حيستفادو منك عشان يمتحنوكي

    وفيه ممكن زي ما قولتي تروحي اي موقع وتعرضي على المهندس اللي شغال انك طالبه وكده وعايزه تتفرجي حتى بس.. وفيه صحابي كتير بيعملو كده
    والمهندس مش خسران حاجه خالص صاحب الموقع.. لان ابسط حاجه بيستفاد منك برضه.. يعني ف النهايه انتي بتعمليلو شغل برضه او على الاقل بتراقبي العمال ف بعض الحاجات المهمه.. فهو يقدر بكده يبقى له 4 عيون بدال 2 بس


  24. ♥ Am fOpa'D ♥

    هههههههههههههههههههههههههههههه
    ماشاء الله :d

    :D:D:D


  25. 24 ساعه لأن التدريب مكنش تبع الكليه + إنه كان في مستشفى بشري كنت بأنزل الطوارئ

    تدريب تبع الكليه لسه مش عليا بس كنت بنزل بردو مع صحباتي إللي في سنه رابعه وبحضر معاهم في العياده
    ده بمواعيد بس مش محدده + إن ممكن يكون سفر لمزارع وكده
    وتقريبا إللي سمعته إن الأولاد بيباتوا لكن البنات لأ ..

    .............


    زهرة :: مخدرات مره واحده !!!
    السنه دي كنت باخد كورس صيدله وبيقولولنا على الأدويه إللي موجوده ولها تأثير المخدرات والناس بتيجي تتطلبها زي تعاطي ..


  26. كان نفسي اطلع دكتور :d
    بس ساعتها كنت حقول نفسي اطلع مهندس برضه :)
    رائع جدا بجد شغل الطوارئ + العمليات


  27. تصدق إنك مخفي فعلا ؟
    النمرتين بتوعك مقفولين يا افندي
    وبيتكم بيرد عليا الانسر ماشين


  28. الف حمدلله على السلامة اخر بوست قريته بتاع الامتحانات والمذاكرة
    ومعرفتش انك عامل بوست جديد غير من تعليق فى الشات بوكس
    كل سنة وانت طيب وبالحة والسلامة



  29. عمك اونلى Says:

    ازيك ياض :)
    ايوه كده فرحتنى
    صدقنى لما هاتتخرج ان شاء الله هاتقول ياريتنى اتدربت اكتر من كده
    لان فى التدريب مفيش عليك اى مسئولية و زى مانت قولت هاتستفيد جدا وهتاخد خبرة
    بعد التخرج بقى انت اللى هاتشيل الموقع بحاله
    ربنا يستر علينا :-\
    Go on...


  30. كل عام و انت بخير
    متأخرة شوية قلت لما تصوم الستة البيض :)

    ربنا يقويك في التدريب و في انتظار ابداعاتك البنائية


  31. كوكو

    مش عارف ليه بحس فيه ناس مقتنعه ان الانسر ماشين ده اغنيه بتسمعها وبعدين تقفل !!
    يبني سجل عشان اعرف :d


  32. آيوشة

    فعلا اتشغلت عن البلوج بقالي كتير اوي

    وحضرتك بخير يافندم :)


  33. انا مش معاهم

    نورت :)


  34. اونلييييييي

    اوني بنفسهههههه !!
    نورت يامعلم والله :)
    اخبارك ايه واحشني جدا انت و مرسي !!

    وعندك حق فعلا

    يله شد حيلك ياجميل :)


  35. أم أحمد المصرية

    وحضرتك بخير :):)
    لو حضرتك عايزه تبني فيلا ولا حاجه رنه بس :d


  36. نعم ..

    ايضا بدأت هذا الصيف تدريب مع احد الأطباء

    و صدقا فرق كبير ...

    يكفي سماع حالات وتشخيصات مختلفة .. :)

    اللهم وفق جميع شبابنا وبناتنا واجعلهم من المتفوقين في كل مجال :)


  37. البنا إمام الجيل


    متهايلي فعلا مهم جدا ف مجالكم التدريب العملي

    بالتوفيق ان شاء الله