السلام عليكم ورحمة الله
طيب هعملي منظر وأقول :
بما إن حضرتك ذكرت إن الوزاره مش حاجه صغيره وإن التغيير الوزاري ده مش صغير أو قليل ..
طيب الأخطاء إللي بتحصل دي في الوزاره بتكون نتيجة إيه !
وليه بعد فتره من اختيار الوزير بيطلع كلام بسوء كفاءة عمل الوزير وتقصيره في تطوير وزارته !!
هل ده بيكون ناتج من الوزير نفسه وإنه غير كفء لكده ولا إن الامكانيات المتاحه ليه مش مخلياه يقدر ينفذ إللي كان مخطط له !!
حاجه كمان ..
هل حضرتك شايف إن ممكن المنصب يغير شخصية الوزير يعني بما إن حضرتك بتقول إن وزير الموارد والري إنسان كويس و.. و .. و ..
وده طبعا نتيجة تعامله معكم كدكتور كان بيدرسكم فهل ممكن يكون فعلا باقي الوزراء فعلا ناس زي كده نظرا لما ذكرت إنهم بيتم اختيارهم من أكفأ الكوادر بس المنصب خلاهم يتغيروا ويتطلعوا لحاجات تانيه بعيده عن أهدافهم الأساسيه !!

عامة دي مسؤوليه مش بسيطه خااااااالص فربنا يعينهم عليها ..


وحمدا لله على عودة مدونة حضرتك وفي انتظار بوستات جديده ..

وعليكم السلام ورحمة الله وبركاته

ماشاء الله تعليق جامد وكبير وشامل حاجات كتير
طب هو طبعا انا مكنتش وزير سابق بس حقول رايي يعني :d
بالنسبه للاعلام فخلاص بجد مبقتش اثق فيه تماما.. كل الناس بتشتم في اي حد وخلاص.. وزي ما قولت في الموضوع سمعت كلام غريب جدا عن التغيير الوزاري ده وكللللله كان غلط تماما !! فحسيت القنوات بتحب تعمل ظيطه بجد بس بدون حاجه حقيقيه.. ولو بتبص على حاجه غالبا بتبص على اخطاء الناس ونادرا ما تذكر محاسنهم..

تاني حاجه اي حد في الدنيا مستحيل يرضي كل الناس.. اكيد فيه قرارات واجراءات بيعملها.. مش لازم بتعجب كل حد وتيجي على هواه.. لازم بيكون فيه جانب من الناس مبيعجبهاش.. واحنا كتير جدا مبيعجبناش العجب اصلا..

وفي نفس الوقت اكيد موارد الدوله قليله واحنا عددنا بيكتر اكتر فنصيب كل واحد من الموارد بيقل كمان.. + ان عليه قيود سياسيه في اتخاذ بعض القرارات..
فالموضوع اكيد فعلا صعب لانه مش مجرد تخطيطط (واللي هو صعب جدا برضه) لانه لازم يخطط في ضوء حاجات كتير جدا..

واخيرا واللي هي اهمممممم حاجه.. اللي هو ان الموضوع مش موضوع وزير بس.. صراحه انا بثق جدا في الوزاره بتاعه احمد نظيف دي بالذات.. لكن المشكله مش في الوزرا.. المشكله في المليون مسؤل اللي تحتهم.. المسؤل والمسؤول اللي تحت المسؤول والمدير اللي تحته والمدير اللي تحته و نائب المدير اللي تحته.. الشجره المرعبه الكبيره دي فيها حاجات سيئه كتير جدااااااا..
عشان كده انا شايف ان فيه وزاره مهمه جدااااااااا اللي هي وزاره الدولة للتنمية الإدارية
http://www.ad.gov.eg/Default
بجد انا شايفها وزاره مهمه جداااااا وشغلها حيريح الشعب في المستقبل جامد جدا..