نصائح وفضائح ? presentation أزاي تعمل


السلام عليكم ورحمة الله وبركاته

الصيف اللي فات كنت في كورس في ال amideast
وكانو طلبو مننا نعمل presentationفي اخر الكورس عن اي موضوع نحبه.. 

ملاحظه.. عشان الكلام بيتلخبط لما اكتب كلمة انجليزي وسط الكلام العربي.. فلما اقول كلمة "البطيخه" تعرفو اني اقصد مكانها كلمة 
presentation

معظمنا ممرش بتجربة انه يعمل البطيخه قبل كده.. فاول مره دايما بيحصل اخطاء كتيره.. وبنتعلم كتير برضه.. ففي التدوينه دي ححاول اقولكم كل الحاجات اللي اتعملناها في الكورس عن ال البطيخه وكمان اللي اتعملناها من كورس تكنكال رايتنج عندنا في الكليه
..

وفي الاخر حقولكم الـفـضـــيــحـــة اللي عملتها في مشروعي :D

<span><span><span>New Page 1</span></span></span>

في الاول حاجه مهمه جدا
 
لما تتكلم مع اي واحد التواصل بينكم بيبقى مبني على 3 حاجات..
اللي هو شايفه بعينه.. زي ال 
body language
الصور - الجرافات -... وده بنسبه 55% !!
تانيه حاجه هي صوتك.. بيعتمد عليها بنسبه 38% درجة وضوحه و انه عالي او واطي.. وهكذا..
تالت نقطه هي الكلمات اللي بتستخدمها.. 7% بس !!
ده بيوضح اد اييييييييه حاجه مهمه جداااااا انك تهتم اوي بالحركاتك اثناء الكلام و درجات صوتك.. لان معظمنا كل تركيزه بيكون على الكلمات والمعلومات نفسها بس..


بالنسبه للحاجات اللي اتعلمناها في المشروع عشان تعمل البطيخه

- اول حاجه واهم حاجه لازم تحدد انت بتعمل
البطيخه
ده لمين ؟ يعني مينفعش نكون مثلا معظمنا خريجين من كلية تجاره وانت عمال تتكلم في ازاي الالكترون بتاع معرفش ايه بيعمل معرفش ايه  !!
ده موضوع محتاج خلفيه كبيره ومتخصص اوي ولازم اللي بيسمعولك يكونو متخصصين زيك
وبالتالي اكيد وش حيفصلو منك.. وعامة اصلا لو ال
البطيخه بتاعك مش في الذيذ
بينفضو لوحدهم.. مابالك لو موضوع مش عارفينو اصلا..

مثلا كان فيه واحده معانا استاذ مساعد في كلية زراعة وقعدت تتكلم عن حشره معينه
بتفاصيل رهيبه جدا ومصطلحات غريبه جدا عننا.. فقعدنا نسمع اول دقيقه بس تقريبا ولا حاجه!! 

فطالما عندك الحرية في انك تتكلم في اي موضوع.. حاول تختار موضوع ميكونش محتاج
معلومات اوليه.. او انك لازم تشرحها في الاول..



- خطأ شائع جدا.. هو انك تبص لل
board
طول الوقت وانت بتتكلم
..
يعني انت بتشرح للناس.. المفروض تبصلهم.. وكمان توزع نظرك على الناس.. يعني مش تفضل باصص لواحد بس طول ال البطيخه بتعتك.. حاول توزع نظرك على اد ما تقدر.. عشان كمان تحس بالناس اذا كانو معاك ولا فصلو و لا مش فاهمين و لا زهقو و لا ايه وتعرف تتصرف.
محدش يعني حيقعد يسمع لواحد مش شايف منه غير قفاه !!

 

 

 

 

  

- مش لازم خالص انك تفضل طول ال البطيخه عمال تتكلم بشكل علمي بس في الموضوع
بتاعك.. حتبقى بايخه الى حد ما يعني ومفيش حاجه تخلي اللي قدامك يسمعلك اوي الا اذا
كان موضوعك شيق جدا و يهمه.. فيفضل انك في وسط ال البطيخه تحكي قصه مثلا ليها علاقه بالموضوع اللي قولته.. او
حتى انك تحكي نكته ليها علاقه نوعا ما بالموضوع مهما كانت
بسيطه..


 
   
 
 

 

 كمان ينصح ( بضم الباء وفتح الصاد ) انك تسال اسئلة خلاللبطيخهعشان يحصل تفاعل وتواصل بينك وبين اللي بتعملهم البطيخه.. مثلا لو بتبدء في نقطه جديده.. ممكن تسأل حد يعرف حاجه عن كذا (اللي هي النقطه دي ) وواحد تاني يكمل على كلامه او يختلف معاه.. وكده الناس حنتبه اكتر..



- فيه حركة برضه عملتها في اول ال البطيخه اني قولت انه في اخره حسأل سؤال على حاجه قولتها في ال ال البطيخه واول واحد حيجاوبها صح حياخد هدية.. ( ممكن تقدم اي حاجه .. مثلا انا عملت الهديه شيكولاته سنكرز ) ده برضه بيشد انتباه الناس اكتر



- حاجه مهمه جدا بجد.. انك بعد ما تحضر ال البطيخه بتعتك سواء مكتوبة او على لباور بوينت او اي حاجه.. لازم تتدرب عليها.. بجد دي حاجه مهمه جدا جدا جدا.. لان ساعتها حتكتشف اخطاء مكنتش شايفها.. كمان حيساعدك في ترتيب افكارك اكتر ويديك ثقه اكبر في نفسك.. وحاجه مهمه جدا جدا جدا وهي الوقت..
حتشوف لما تعمل البطيخه هي محتاجه وقت اكبر من المتاح ليه ولا اقل وبالتالي حتحاول تختصر فيها او تذود حاجات تانيه..

طبعا لو ينفع تجيب ناس يسموعك وانت بتدرب حيبقى افضل.. ساعتها ممكن تسمع اسئلة ممكن

كنت حتتسالها في ال البطيخه الحقيقي بتاعك.. وتاخد بالك من الكلمات اللي ممكن
ميفهومهاش مثلا.. وبالتالي حتكون محضر شرح للكلمات دي او تكون بدلتها بكلمات اسهل..



- لو انت عامل ال البطيخه على ال
Power Point
خطأ شائع برضه.. انك تكتب كلللل اللي انت عايز تقوله في ال
slides
..
وبالتالي وانت بتعمل ال البطيخه حتلاقي نفسك مجرد بتشاور على الكلام بتقراه من على الشاشه بس !! صباح الملل يعني.. فانت المفروض تخلي العنواين والنقاط الرئيسية بس مع الصور اللي في السلايدز.. وباقي الكلام حتقوله بنفسك..
 
 
 

 

ممكن تكتب جزء من الكلام اللي انت حتقوله في ورقه تمسكها في ايدك او تحطها قدامك 
بحيث لو توهت في اي حته ترجع للورقه دي.. وطبعا ترتبها نفس ترتيب ملف ال
Power
Point

وممكن تعلم بالخط التقيل على كلمة في كل كام جمله توضحلك الحته دي عن ايه..
وبالتالي لو توهت وانت بتشرح ورجعت للورقه.. يادوب حتبص على الكلمات اللي معموله
بخط تقيل فتلاقي النقطه اللي بتدور عليها بسهوله..


- الصورة خير من الف كلمة


- قالتلنا برضه من الحاجات الكويسة جدا جدا انك تحط مصادر
للمعلومات في الاخر لو حد حابب يعرف ذياده عن الموضوع بتاعك..
ممكن تحط اسم
كتاب ولا 2.. وكام موقع على النت مثلا..



- غلطه كنت حقع فيها.. اني استعملت فونت مش بيبقى موجود على كل الاجهزة.. فبالصدفة
بجرب الفايل عند جهاز اختي لقيته كلــــــــــــــــه رموز !!
تخيلو تخشو القاعه عشان تعملو البطيخه وتيجو تفتحو الفايل اللي حتعملو كل البطيخه منه.. كل اللي تلاقوه في الاخر

فيفضل انك تستعمل فونتات
( Fonts )
عادية
.. الا لو ناوي تعمل ال ال البطيخه من على الاب توب بتاعك ( في حاله انك بتعرف ازاي توصل البروجكتور بالاب بتاعك )
 

 
- حاجه مهمه جدا جدا جدا جدا جدا جدا بجد..
انك تستعمل ادوات
وحاجات حقيقيه عن الموضوع بتاعك
.. يعني لو بتعمل البطيخه عن مكونات
الكومبيوتر.. هات معاك كارت شاشة و هارد مثلا.. بتبقى حاجه كويسه جدا وانت بتتكلم تستعمل الحاجات دي.. بتكون افضل من الصور الف مره والناس بتبصلها اكتر وبتشد النظر والتركيز جدا..

..
 

 
 
 
 
 
 

بالنسبه للفضيحه بقه اللي عملتها.. هو كانو طلبو مننا كل واحد يعمل مشروعه عن اي حاجه يحبها.. فانا اخترت اعمله عن شرم الشيخ.. فقبل البتاع بيومين.. لقيت فيه واحده مختاره تعمله عن الاسكندريه وحد تاني عن مدينه تالته.. وبالتالي حيبقى فيه 3 بيتكلمو هم كلهم عن مدن !! فحيبقى اكيد في تشابهات كتير جدا منهم وفحيعمل نوع من التكرار والملل..

 
 
 فقولت ايه.. لازم افتكس

قومت قولت ايه.. البس مايوه وانا بعمل البطيخة.. كده حشد انتباهم اوي ويركزو معايا ويسيبوهم من البتاع نفسه حتى :D
وروحت قعدت استشير صاحبي قبل ما نبدء.. فل الاول مدنيش راي واضح وقعد يقول هي الفكره جديده وكلام كده يعدين.. وبعدين قال في الاخر خالص لأ
المهم نفضتله وقولت خلاص لا مفر :d
 
 
 
 
 
 
  


وبعدين جيه دوري.. تخيلو انتو بقه.. 10 presentations شغالين وكل واحد طالع ببدله و
مظبط نفسه اخر شياكه و عمال بيتكلم كانه دكتور في الجامعه.. وبعدين لقو واحد طالع
بمايوه ( وياريته مايوه محترم.. ده مايوه هاواي يعني اااااااااااخر فضيحه ) وكمان
كنت لابس الزعانف بتاعه السباحه ومش عارف امشي بيها وعماله تطرقع على الارض كل ما اتحرك

متخيلين الصدمة ؟ 

قعدو يضحكو عليا ويصوروني وحاجات غريبه كده طول مانا بتكلم.. 


 في الاخر الحمد لله عجبتهم اوي البطيخه وكانو مركزين معايا  و كنت
الوحيد اللي خدت الدرجه كامله بتاعه المشروع


بس هي دي الفضيحه بتعتي.. في بلااااااااوي وتفاصيل فظيعه طبعا.. زي ازاي قلعت البنطلون اللي تحته المايوه جوا القاعه !!
 بس حاسس انها مش مناسبه شيويه للبنات يعني.. مع ان معظم اللي كانو في الكورس ده كانو بنات اصلا.. (اكتر حاجه مش قادر انساها ان فيه واحده شافتني لحظة وانا بنزل البنطلون واد ايه اتصدمت يعيني عشان مش فاهمه ان فيه مايوه)

المهم ياريت لو حد عنده اي ملاحظات او نصايح يحب يضفها من خبرته او مشروع كويس شافه يقولهولنا.. ولو حد حابب يحكلنا موقف حلو حصل برضه وهو بيعمل البطيخه ياريت ينورنا في التعليقات :)

46 Responses
  1. eng: nagwa Says:

    ههههههههههههههههه

    صعبه اوى الفضيحه ديه وكمان وقت البرزينتاشن

    بس بجد معلومات حلوة اوى الي حضرتك قلتها

    انا اخدت حاجات مشابهه لكده في الكليه مه ال IST

    اكيد حضرتك سمعت عنه بس طبعا علي مستوى اقل شويه لانى اخدته السنه الى فاتت وكانو لسه بيجربو فينا

    بس حاسه انى استفدت منه كتير

    وبردو عملت شويه فضايح بس علي ادى يعنى :D

    وكفايه انى عملت (بؤلوز) بالعجينه الصلصال واصحابي اتريقو عليا


  2. SaRaSeErO Says:

    حاجات كلها تمام

    body language & comunictn skills

    بيتهيألى دول اهم حاجه

    دول اذا اصلن مش موجودين
    انسى

    اسألو مجرب

    انا كنت بعمل برزينتاشن ف ماده عجيبه عندنا كدا
    المهم الدكتوره قالتلى هديكى صفر

    اه وربنا

    بس معرفش ادتهولى ولا لاء


  3. eng: nagwa Says:

    في مرة اثناء الكورس طلبو منى ارسم رسمه في 30 ثانيه

    تتوقعو رسمت ايه

    رسمت بطه هههههههه

    ولما سالتنى ديه رمز لايه قلتلها اصلي جعانه :D

    هيا توقعت منى اى رسمه هندسيه صغيره ما توقعتش انى ارسم بطه خالص


  4. SaRaSeErO Says:

    هههههههههههههه

    حلوه اصلى جعانه دى


  5. ههههههههههههههه

    عارف يابني صوره الولد الي ايده ع كتفه وراسه مايله وشكله عليه النوم

    انا لسه صاحيه حالا وشكلي عامل كده

    بس اما سمعت ان فيها مايوه برقت وتنحت وبعدين قعدت اضحك موووت ههههههههههههه

    الحمدلله ماعملتش بطيخ قبل كده :D

    بس نصيح بجد حلوة وان شاء الله نستفيد

    ونطلع بمايوه قدام الرأي العام قريب

    وانت اول واحد هيعرف ههههههههه


  6. Sama Says:

    ههههههه

    لاء افتكاسه مفتكسه بجد :D

    جاتلك الفكره دي ازاي يا باشمهندس :D

    كل الكلام اللي حضرتك قولته عن البطيخه :D

    تمام جدا و مش ناقص حاجه تقريبا ما شاء الله ذاكرتك كويسه :D

    انا برده اخدت كورس عن البطيخه و الحاجات دي كلها كانك الدكتور اللي كان واقف يشرح و الله

    بس انا عمري ماعملت بريزينتيشن قبل كده حتي في ريسيرشات الكليه وكده

    انا بالذات مينفعش خالص لاني هبوظ الدنيا ظ:D

    انا بتكسف و باحرج جدا يعني حتي لو عملت هتلاقيني باصه للورق الي قدامي و بقول الكلمتين بسرعه عشان اخلص :D

    بس هو زي ماقولت ان التفاعل مع الناس اللي قدامك و محاوله توصيل الافكار ليهم بطريقه مبسطه

    من اهم الحاجات اللي بتادي لبطيخه صح :D

    و حكايه الباور بوينت و الفونتس كل دي حاجات ناس كتيره بتقع فيها برده

    بس من اهم الحاجات برده في البطيخه حكايه اللبس دي :D

    لو حاجه تخص شغل طبعا مش كورسات ولا
    كده الاهتمام بالمظهر مهم جدا

    ده حتي الدكتور كان قال ان طبعا اللبس كله فورمال

    و الولاد المفروض مش يعملوا شعرهم جيل بطريقه مبالغ فيها يعني و البنات و الميكب و اللبس الغريب وكده :D

    اه نهتم بالمظهر بس مش لدرجه ان لناس تفقد تركيزها في الكلام و يتفرجوا علي لبس اللي قدامهم و كده

    ده في البطيخات المهمه اللي تخص الشغل وكده :D

    اصل حضرتك لو عملت الافتكاسه دي في تقديم لشغل في شركه او حاجه

    اكيد طبعا هتكون اول المقبولين :D


  7. Maha Says:

    بطيخة :D

    موتتني من الضحك دي :)

    أخونا عشان مشكلة الإنجليزي في التدوينة

    ادخل على الاعدادات
    settings

    وبعديها تنسيق
    formatting

    واختار من خانة اللغة اللغة العربية

    المفروض ده يظبط المدونة

    ***

    بالنسبة للبريزنتاشن انا في الكلية حفظت المعايير دي لأن تقريبا كل مادة كان لازم ليها بريزنتاشن

    بس للأسف مش كل الدكاترة بيكونوا عايزين يمشوا على المعايير دي رغم إنها الأفضل


  8. بشمهندسه نجوى:

    ماشاء الله الكورسات دي مفيده جدااا على فكره بجد.. حتى بعيدا عن الكورس ككورس او انك تستخدميه لما تيجي تعملي البطيخه.. في حياتك نفسها الاجتماعيه الحاجات دي مفيده جدا جدا جدا


  9. دكتور سراسيرو:
    :D:D
    عادي يادكتور اي واحد في الاول مهما كان لازم بيتخض خضات لانهائيه بكل درجاتها.. بس فعلا مع التدريب ومن انك ((ترمي نفسك في البحر كذا مره)) لازم لازم حتتعلمي غصب عنك السباحه!!
    اه معليش في الاول حتبقي بتغرقي وكده بس بعد كده حتاخدي على الموضوع الى حد كبير

    وغريبه انكم عندكم مواد في صيدلة تعتمد على عمل البطيخه بالاهميه دي !

    ان شاء الله يكون اداكي درجه كويسه :)


  10. بشمهندسه نجوى
    ايه حكايه بؤلوظ دي :D
    وايه علاقتها بالبطيخه

    وجامد الموقف بتاع البطه والاجمد التفسير :D
    عشان جعانه :D:D:D:D



  11. Sama:
    اصل كتبتهم وانا قاعد هناك
    فيما يخص الذاكره عايز اجيبلكم الواد هيلسنج مره يكلمكم شيويه عن ذاكرتي :D
    والله العظيم احيانا بحس اني معنديش الجزء بتاع الذاكره ده !!!

    بالنسبه للخضه زي ما قولت لدكتور سراسيرو.. هو لازم تدريب كتير..
    انا سمعت على فكره مره ان موضوع الخوف من ان الواحد بيتكلم قدام ناس كتير في مصر يرجع لحاجتين..
    السبب الاول ان في المدارس الموضوع ده مش مطلوب نهائيا خالص.. فعمر ما حد بيعمله طول 16 سنه مثلا!!
    والسبب التاني ان حكاية ان الواحد يتكلم قدام ناس كتير ارتبط في زهن الواحد بالحاجه الوحيده اللي كانت بتحصل كده.. اللي هي لما كان المدرس يوقفه في الفصل عشان يسأله سؤال في الدرس.. فكان لازم بيخوف خايف.. فالخوف ارتبط في مخه بلما يتكلم قدام ناس كتير

    حلوه حتة اللبس دي.. مفتكرش في الكورسين حد اتكلم عنهم عشان مش مطلوبين يعني طبعا..
    اضافه مفيده :)

    هو بس اي بطيخه طقم البحر بتاعي جاهز :D


  12. Maha:
    اهلا اهلا اخت لوتس :)

    اول حاجه ربنا يكرمك يارب على الحركه بتاعة ال
    formating
    على فكره حضرتك قولتيلي زمان على الحركة بتاعة Home
    ودي جامده جدااااا برضه
    وحبقى اجرب الحركه دي برضه
    جزاكم الله خيرا جزيلا بجد عشان حتوفر مجهود رهيب

    وبالنسبه للمعايير حضرتك خلاص خلصتي منهم :) فانتي اللي حتحددي المعايير الافضل من تفاوت تفاعل ناس معاكي


  13. sama Says:

    انا بقي الموضوع معايا بالعكس

    يعني و انا صغيره كنت شطوره بقي وكده و مكنتش بتكسف من المدرسين وكده

    لما روحت الكليه بقي اتغيرت خالص

    هو تقريبا عشاني مش ببقي عارفه مين بيتكلم في ايه فبحس نفسي هلبخ الدنيا :d

    بس بجد كنت زمان غير كده دلوقتي بقيت باحرج من اقل المواقف يعني

    عموما الناس كلها في الكليه عارفه الموضوع ده و كيد مش انا اللي هيطلبوا مني اعملهم بريزينتيشن :d

    بس غريبه اوي حكايه اللبس دي

    يعني لو حضرتك في شركه و شغل وكده

    هينفع تلبس كاجوال مثلا؟


  14. sama Says:

    و عايزين مستر هيلسنج عشان نعرف موضوع الذاكره اللي مش موجوده دي :d


  15. لا طبعا
    وبهزر على موضوع طقم البحر دي :D
    بس قصدي فعلا المظهر مهما جدا.. بس مع ذلك مش فاكر ان حد قالنا حاجه اللبس.. او اصلا انا كنت بغيير بقه فمسمعتش الجزء ده :D



  16. eng: nagwa Says:

    حكايه بؤلوز وماما نجوى هههههه

    الحكايه ان مرة في احدى ال (سيشن) قسمونا الي 3 جروبات ووزعو علينا

    عجينه صلصال وطلبو من كل جروب انه يعمل اى منتج للبيع ويكون مش مكلف

    ونعمله دعايه كويسه للبيع

    كل جروب عمل حاجه الناس بتستعملها

    فالجروب الى كنت منه عملنا زى لعبه اطفال سرير بمرجيحه وفيه زى راجل لعبه نايم فيه

    يعنى عشان الاطفال كلها بتحب العب وكمان لعبه مش غاليه

    المهم انا الي عملت الولد النونا الى جوا وسميته بؤلوز ورحت بيه الكليه تانى يوم واصحابي فضلو يتريقو عليا

    وفضلو يلعبو بيه وبعدين قطعو رقبتوه ورموه في الجبلايه

    طبعا زعلت عليه وعملتلوه عزا كبير ونزلت صوره علي الفيس في البوم لوحده

    بس ما حدش يضحك عليا بقي انا شكلي فضحت نفسي اصلا

    :D:D:D:D


  17. بطيخه

    :)

    حلوه دى .. نفسى أقف قدام الناس كدا وأعمل بطيخه ,, بس هاعملها فين بقى !! أبقى أعمله فى بيتنا قدما ماما وبابا واخواتى

    :D

    بس بجد الموقف دا حصل المايو وكدا يعنى

    صعبه أوى دى :D


    شكراً يا باشمهندس ع النصايح دى


  18. أزال المؤلف هذا التعليق.

  19. أزال المؤلف هذا التعليق.

  20. بشمهندسه نجوى
    هههههههههههههههههههههههههههههههههههههههههههههههههههههههههه

    بجد لازم تحطيلنا الصور بتعته هنا :d


  21. زهرة الامل:
    ايه ده ماشاء الله معظم الناس بتخاف وبتحاول تهرب منه

    ممكن مشروع التخرج يستدعي وجود بطيخه :)


  22. Sama Says:

    ايه ده

    بؤلظ اللي موجود في صور الفيس بوك يا نوجا :D


  23. eng: nagwa Says:

    يا خراشي

    انا شكلي فضحت نفسي

    ايوة يا سما هوا الى في الفيس

    شفتى امور ازاى ؟

    باشمهندس انا مش بعرف انزل صور هنا خالص.


  24. لا عادي يافندم :)
    بصي حضرتك ارفعي الصور على
    http://www.imageshack.us/ مثلا
    وحطي اللينكات هنا بس


  25. Sama Says:

    طب و الله بجد حلو جدا

    و الواناته جميله

    بس هو مش قلبوظ يعني عشان تسميه بقلظ :D


  26. Sama Says:

    طب و الله بجد حلو جدا

    و الواناته جميله

    بس هو مش قلبوظ يعني عشان تسميه بقلظ :D


  27. eng: nagwa Says:

    مش عارفه احط انهى لينك منهم
    ده لينك منهم

    [url=http://img5.imageshack.us/my.php?image=n6147741243871539020.jpg][img=http://img5.imageshack.us/img5/5623/n6147741243871539020.th.jpg][/url]


  28. eng: nagwa Says:

    http://img5.imageshack.us/my.php?image=n6147741243871539020.jpg


    لو مش ظاهره قولولي بقي

    هوا فيه صور كتير


  29. غير معرف Says:

    انت مش كفاية الفضيحة نفسها كمان بتنشرها علنا
    فرحان بنفسك اوي :P


    اللي عايز يعرف حكاية الذاكرة المفقودة دي كفاية يعرف ان مرة طارق قعد يكلمني في التليفون نص ساعة وبعدها يقوللي انا نسيت اتصلت بيك ليه؟!

    وهكذا بقى احنا كنا متفقين على ايه
    احنا رايحين فين
    كنا بنقول ايه
    انه يحكي موضوع اكتر من مرة

    دي كانت الاعراض
    ياريت لو حد عنده علاج ليه :D


  30. sama Says:

    شكلكوا اصحاب اصحاب يعني مش اي كلام :D

    النصيحه

    ممكن حضرتك يا باشمهندس تاخد اي حاجه فيها Sulphonamide او tetracyclin

    :p

    و انصح حضرتك يا مستر هيلسنج انك متكلموش فون تاني ابدا :d

    العلاج ده يستمر لمده 3 شهور و بعدها نقرر هنعمل ايه بالظبط


  31. حضرتك انا طول البوست بضحك على حاجة واحدة
    الا وهي البطيخة

    مش قادرة اتصور ان الكلام كله جد كدة وفى النص كل شوية كلمة البطيخة

    :D :D :D


  32. ريمان Says:

    هههههههههههه


    ربنا يعينك يا رب

    ويصبرك كمان وكمااااااان


    سعيده اوى بمروروى هنا

    تحياتى ليك


  33. بشمهندسه نجوى
    اللينك بتاع ال Direct link
    وماشاء الله والله لذيذ جدا :D
    وحلوه الحته الصفرا الملولوه دي
    وايه ال Structures دي بس :)


  34. منور ياحاج هيلسنج :D
    متنساش بس ميعادنا بكره انت يافالح


  35. فيت سما:
    ايه اللي حضرتك كتبتيه ده :S:)


  36. كفايـة طيبـة:
    حضرتك بتغيري الموضوع :P
    حضرتك اعلام يعني اكيد عملتي بطيخ كتير.. وبالتالي فيه فضايح كتير :)


  37. ريمان:
    ربنا يكرمك يافندم حضرتك شرفتينا في الممدونه :)


  38. MaNoOoSh Says:

    ايه المدونة الفظيعة دى
    شكلى كدة هبقى لاجئة فيها
    مايوووووووووووووووووووه يا مفترى
    مايووووة فى البريزنتيشن
    هههههههههههههههه
    بس فكرة مبتكرة وصادمة
    يللا اسيبك بقى علشان اروح اقرأ موضوع البنات بتاعك


  39. اهلا اهلا MaNoOoSh اول مره تشرفينا في البلوج :)

    والحمد لله انها عجبتك :)


  40. ههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
    ههههههههههههههههههههههههههههههههههههههههههه
    هههههههههههههههههههههههههههههههههههههههههههههه هههههههههههههههههههههههههههههههههههههههههههههههههههههههههههههههههههههههههههههه
    هههههههههههههههههههههههههههههههو لله متت من الضحك
    ههههههههههه


    "))))))وبعدين جيه دوري.. تخيلو )انتو بقه..10 presentations شغالين وكل واحد طالع ببدله و
    مظبط نفسه اخر شياكه و عمال بيتكلم كانه دكتور في الجامعه.. وبعدين لقو واحد طالع
    بمايوه ( وياريته مايوه محترم.. ده مايوه هاواي يعني اااااااااااخر فضيحه ) وكمان
    كنت لابس الزعانف بتاعه السباحه ومش عارف امشي بيها وعماله تطرقع على ((((((((الارض كل ما اتحرك


  41. بكفي ضحك.....بذكر اول مرة عملت فيها برزنتيشن كانت في محاضرة " فلسطين الارض و الانسان " مع استاذ ما بطيق اشوف شكله و وقفت على المنصة استنى دوري ساعة و ربع ...و في اخر المحاضرة الاستاذ حكى " يلي ضلو بسرعة احكوا يلي عندكو " انا طبعا بدي اعمل المطلوب " كانت البرزنتيشن نص دقيقة بالضبط " لا اكثر و لا اقل....يعني ما كنتش مستاهلة تقف ساعة و ربع على رجليك قدام(250) طالب و طالبة


  42. :D:D:D
    يعيني ساعه وربع :D
    واصلا الواحد بيبقى قلقان وعايز يظبط كل حاجه فالوقت بيمر ببطء شدييييييد

    بس ازاي تعملو بطيخه في 30 ثانيه :d


  43. غير معرف Says:

    شي كتييبيييييير بيضحك انا كتير عجبني بتاع المايو بس فكرة رهيييييييييييييبة بجد وانا بفكر اعمل كدا اقولكم بطروني من البطيخة ههههههههههههههههه


  44. zaid Says:

    غلطه كنت حقع فيها.. اني استعملت فونت مش بيبقى موجود على كل الاجهزة.. فبالصدفة
    بجرب الفايل عند جهاز اختي لقيته كلــــــــــــــــه رموز !!
    تخيلو تخشو القاعه عشان تعملو البطيخه وتيجو تفتحو الفايل اللي حتعملو كل البطيخه منه.. كل اللي تلاقوه في الاخر